नगरपंचायतीत तोडफोड करणार्या मनसे कार्यकर्त्यांना कोठडी

आमगाव , दि. २3 : नगरपरिषदेने शहरातील रस्ते, बांधकाम, स्वच्छता ही कामे तत्काळ करावी, या मागण्यांसाठी मनसेने दीड महिन्यापूर्वी निवेदन दिले होते. मात्र, यावर नगरपरिषदेने काही उपाययोजना न केल्याने आक्रमक झालेल्या मनसे कार्यकर्त्यांनी शुक्रवारच्या दुपारी नगरपरिषदेच्या कार्यालयाची तोडफोड केली होती.त्याप्रकरणी मनसेच्या ९ कार्यकर्त्यांना अटक करण्यात आली होती.त्याना न्यायालयात हजर केल्यानंतर 3 दिवसाच्या  कोठडीत पाठविण्यात आले आहे.महाराष्ट्र नवनिर्माण सेनेच्या कार्यकर्त्यांनी नगरपरिषदेच्या कार्यालयाची तोडफोड करत काम बंद पाडले. तसेच, कार्यकर्त्यांनी प्रशासन मुर्दाबाद असे नारेही दिले. ही घटना कळताच पोलिसांनी घटनास्थळी धाव घेतली. मात्र, तोपर्यंत कार्यकर्ते पसार झाले होते.पालिका प्रशासनाच्या तक्रारीवरून मनसेच्या कार्यकर्त्यां विरोधात आमगाव पोलीस ठाण्यात गुन्हा नोंदवण्यात आला. याप्रकरणी मनसेच्या ९ कार्यकर्त्यांना अटक केली आहे. त्यांच्यावर शासकीय मालमत्तेच्या नुकसानीचा गुन्हा दाखल करण्यात आला आहे.