• कडेकोट पोलिस बंदोबस्त, संवेदनशील केंद्रांवर विशेष लक्ष
• बाहेरगावातील मतदारांनाही आवाहन

नागपूर, दि. १८ :  नागपूर आणि रामटेक लोकसभा मतदारसंघात 19 एप्रिल रोजी मतदान होत असून यासाठी जिल्हा निवडणूक यंत्रणा सज्ज झाली आहे. मतदानाच्या ठिकाणी कडेकोट पोलिस बंदोबस्त राहणार असून संवेदनशील केंद्रांवर विशेष लक्ष राहणार आहे. मतदान पथके 18 एप्रिल रोजी सकाळपासून रवाना होणार असल्याची माहिती जिल्हा निवडणूक अधिकारी डॅा. विपीन इटनकर यांनी दिली.

जिल्हाधिकारी कार्यालयातील एनआयसी सभागृहात पत्रकार परिषदेचे आयोजन करण्यात आले होते. यावेळी जिल्हा पोलिस अधीक्षक (ग्रामीण) हर्ष पोद्दार, पोलिस उपायुक्त श्वेता खेडकर, उपजिल्हा निवडणूक अधिकारी प्रवीण महिरे, तहसिलदार (निवडणूक) वैशाली पाटील यावेळी उपस्थित होते.

गेल्या लोकसभा निवडणुकीच्या वेळी सुमारे 54 टक्के मतदान झाले होते. यंदा ही टक्केवारी 75 टक्क्यांवर न्यावयाची आहे. यासाठी सर्वांनी या लोकशाहीच्या उत्सवात सहभागी व्हावे. विशेषतः नागपूर बाहेर वास्तव्यास असलेल्या नागरिकांनी मतदानाचा हक्क बजावण्यासाठी नागपूरात यावे.   मतदान शपथ, मॅरेथॅान, बुथ अवेरनेस ग्रुप, सोसायटी कनेक्ट अशा मतदार जनजागृतीपर कार्यक्रमांचे आयोजन करण्यात आले. सर्वांनी लोकशाहीच्या या उत्सवात सहभागी जरूर सहभागी व्हावे, असे जिल्हा निवडणूक अधिकारी डॅा. इटनकर यावेळी म्हणाले.

जिल्ह्यात 124 संवेदनशील मतदान केंद्रे

नागपूर आणि रामटेक लोकसभा मतदारसंघ मिळून 124 संवेदनशील मतदान केंद्रे आहेत. यात रामटेकमध्ये 63 तर नागपूरमध्ये 61 केंद्रे आहेत. यात काटोल 15, सावनेर 11, हिंगणा 7, उमरेड 13, कामठी 7 तर रामटेकमध्ये 10 संवेदशील मतदान केंद्रे आहेत. तर नागपूर लोकसभेंतर्गत नागपूर दक्षिण पश्चिम विधानसभा मतदारसंघ 11, नागपूर दक्षिण 11, नागपूर पूर्व 10, नागपूर मध्य 8, नागपूर पश्चिम 9, नागपूर उत्तर 12 अशा एकूण 61 मतदान केंद्रांचा समावेश आहे. या केंद्रांवर विशेष लक्ष राहणार असून पोलिसांचा कडेकोट बंदोबस्त तैनात राहणार आहे. यातील सुमारे 50 टक्के मतदान केंद्राचे वेबकास्टिंग होणार आहे.

रामटेकमध्ये 2405 तर नागपूरमध्ये 2105 मतदान केंद्रे

जिल्ह्यात एकूण 4510 मतदान केंद्रे आहेत. यात रामटेकमध्ये 2405 तर नागपूरमध्ये 2105 मतदान केंद्रे आहेत. यात सहाय्यकारी मतदान केंद्रांचाही समावेश असल्याची माहिती जिल्हाधिका-यांनी यावेळी दिली. या ठिकाणी क्षेत्रीय अधिकारी, मतदान पथकांची नियुक्ती करण्यात आली असून ही पथके उद्या, दि. 18 एप्रिल रोजी मतदानस्थळी रवाना होणार आहेत. मतदान पथकांसोबत प्राथमिक वैद्यकीय किट, ग्लुकोज असणार आहे. आशा सेविका, अंगणवाडी सेविका यांची यासाठी मदत घेतली जाणार आहे.

12 महिला मतदान केंद्रे

दोन्ही लोकसभा मतदारसंघ मिळून 12 महिला मतदान  केंद्रे  असणार आहेत. प्रत्येक विधानसभेत प्रत्येकी एक महिला मतदान केंद्र असणार आहे.

कडेकोट पोलिस बंदोबस्त

नागपूर लोकसभेसाठी 321 पोलिस अधिकारी, 4 हजार 250 पोलिस कर्मचारी आणि 1 हजार 800 होमगार्डस यांच्यासह केंद्रीय राखीव पोलिस दलाच्या तुकड्या तैनात असणार आहेत. रामटेकसाठी 151 अधिकारी, 2 हजार 676 कर्मचारी, 1 हजार 534 होमगार्ड आणि 3 केंद्रीय पथक असणार आहेत. संवेदशील केंद्रामध्ये अधिकचे पोलिस मनुष्यबळ उपलब्ध करून देणार आहेत.

सी व्हिजिल ॲपवर 64 तक्रारी

सी व्हिजिल या ॲपवर 64 तक्रारींची नोंद करण्यात आली.  यात 20 तक्रारींमध्ये तथ्य  आढळून आले नाही. तर 44 तक्रारींचे निरसन करण्यात आले.

देवलापार येथे आदिवासी मतदार केंद्र

देवलापार येथे आदिवासी मतदान केंद्र असणार आहे.  मतदान सुरू होताच सुरुवातीच्या मतदारांचे पारंपरिक आदिवासी पद्धतीने स्वागत करण्यात येणार आहे. यासोबतच दिव्यांग, युवा अशी विशेष मतदान केंद्रे असणार आहेत. दिव्यांगांसाठी व्हिलचेअरची व्यवस्था करण्यात येणार आहे. यासोबतच काही मतदान केंद्रांवर प्रायोगिक तत्वावर मतदान केंद्रांवर टोकन पद्धतीचा अवलंब करण्यात येणार आहे.

अमरावती : ‘रोडगा पार्टी’च्‍या निमित्‍ताने मालखेड येथील तलावानजीक सहभोजनासाठी गेलेल्‍या दोन तरूणांचा पाण्‍यात बुडून मृत्‍यू झाला. ही घटना बुधवारी दुपारी घडली. श्रीक्षेत्र सावंगा विठोबा येथील ही घटना आहे.

• निवडणूक प्रचाराची वेळ आजपासून समाप्त

         गोंदिया, दि.17 : भारत निवडणूक आयोगाने लोकसभा सार्वत्रिक निवडणूकीचा कार्यक्रम घोषित केलेला आहे. त्यानुसार भंडारा-गोंदिया लोकसभा मतदारसंघात 19 एप्रिल 2024 रोजी मतदान होणार आहे. सदर निवडणुकीसाठी जिल्हा प्रशासन सज्ज आहे, असे जिल्हाधिकारी तथा जिल्हा निवडणूक अधिकारी प्रजित नायर यांनी सांगितले.

        लोकसभा सार्वत्रिक निवडणुकीच्या पार्श्वभूमीवर आज उपविभागीय अधिकारी कार्यालय गोंदिया येथील सभागृहात जिल्हाधिकाऱ्यांच्या अध्यक्षतेखाली पत्रकार परिषदेचे आयोजन करण्यात आले होते, त्यावेळी निवडणूक प्रक्रियेची माहिती देतांना ते बोलत होते. यावेळी जिल्हा पोलीस अधीक्षक निखिल पिंगळे यांची प्रामुख्याने उपस्थिती होती.

        जिल्हाधिकारी श्री. नायर म्हणाले, भारत निवडणूक आयोगाच्या निर्देशानुसार 17 एप्रिल 2024 रोजी सायंकाळी    6 वाजता पासून उमेदवारांच्या प्रचाराची वेळ समाप्त होत असून आदर्श आचारसंहिता अंतर्गत लोक प्रतिनिधीत्व अधिनियम 1951 चे कलम 126 अंतर्गत जिल्ह्यात कलम 144 लागू करण्यात आली असून मतदानाच्या दिवसापासून 48 तास पूर्व कोणत्याही राजकीय पक्षाला निवडणूक प्रचार करणार येणार नाही. जिल्ह्यात एकूण 10 लाख 92 हजार 546 मतदार आहेत. यामध्ये 5 लाख 41 हजार 272 पुरुष मतदार आहेत तर 5 लाख 51 हजार 264 स्त्री मतदार असून इतर 10 मतदार आहेत. जिल्ह्यातील चारही विधानसभा मतदारसंघात एकूण 401 मतदारांनी गृह मतदान केले असून निवडणूक प्रक्रियेत समाविष्ट असलेले 4 हजार 467 मतदारांनी पोस्टल बॅलेट मतदान केले आहे. जिल्ह्यात एकूण 1288 मतदान केंद्र आहेत. जिल्ह्यातील प्रत्येक मतदान केंद्रावर दिव्यांग मतदार व 85 वर्ष अधिक वयोगटातील मतदारांकरीता मतदान केंद्रावर आवश्यक त्या सोई-सुविधा उपलब्ध करुन देण्यात आल्या असून 723 व्हिलचेअरची व्यवस्था करण्यात आलेली आहे. जिल्ह्यातील 644 मतदान केंद्रावर वेब-कास्टींग संच लावण्यात आले असून विधानसभा मतदारसंघ स्तरावर व जिल्हास्तरावर कंट्रोल रुमची स्थापना करण्यात आली आहे. सध्या उन्हाळ्याचे दिवस असल्यामुळे उष्णतेची तीव्रता लक्षात घेता उष्माघात टाळण्यासाठी जिल्ह्यातील सर्व मतदान केंद्रावर आरोग्य विभागामार्फत मेडिकल कीटची व्यवस्था करण्यात आलेली आहे. जिल्ह्यातील चारही विधानसभा मतदारसंघात 19 एप्रिल रोजी मतदान केंद्रावर 5 हजार 716 अधिकारी व कर्मचाऱ्यांची नियुक्ती करण्यात आली आहे. सदर निवडणुकीत नियुक्त मतदान पथकांना मतदान केंद्रावर पोहचविण्यासाठी व परत आणण्याकरीता 181 बसेस व 241 जिपची व्यवस्था करण्यात आलेली आहे. 63-अर्जुनी मोरगाव व 66-आमगाव विधानसभा मतदारसंघात मतदानाची वेळ सकाळी 7 वाजेपासून ते दुपारी 3 वाजतापर्यंत राहणार असून 64-तिरोडा व 65-गोंदिया विधानसभा मतदारसंघात मतदानाची वेळ सकाळी 7 वाजेपासून ते सायंकाळी 6 वाजतापर्यंत राहणार आहे असे त्यांनी सांगितले.

          निवडणूक पार्श्वभूमीवर जिल्ह्यात कायदा व सुव्यवस्था अबाधित राखण्याच्या दृष्टीने दिनांक 17, 18 व 19 एप्रिल रोजी ड्राय डे म्हणून पाळण्यात यावा. मतदान केंद्राच्या 100 मीटर परिसरात प्रतिबंध करण्यात आले आहे. कोणत्याही व्यक्तीला मतदान केंद्रावर मोबाईल सोबत बाळगता येणार आहे. रात्री 10 वाजेनंतर स्पीकर वाजविण्यावर बंदी असणार आहे. नागरिकांनी कुठल्याही प्रकारची अफवा पसरवू नये. सुजान नागरिकांनी निवडणूक आयोगाने दिलेल्या सूचनांचे काटेकोरपणे पालन करावे, अन्यथा संबंधितांवर योग्य ती कारवाई करण्यात येईल असे जिल्हा पोलीस अधीक्षक निखिल पिंगळे यांनी सांगितले.

मतदार चिठ्ठी मिळाली नसल्यास मनपाच्या टोल फ्री क्रमांकावर संपर्क करा

चंद्रपूर १७ एप्रिल – चंद्रपुर लोकसभा मतदारसंघात 19 एप्रिल रोजी मतदान होणार आहे.या मतदानात मतदानाचा टक्का वाढविण्यासाठी प्रशासनातर्फे SVEEP (Systematic Voter’s Education and Electoral Participation) अंतर्गत वेगवेगळे उपक्रम राबविण्यात येत असुन चंद्रपूर महानगरपालिकेतर्फे 19 एप्रिल रोजी जे नागरीक मतदान करतील,ज्यांच्या बोटाला शाई असेल त्यांना 19 व 20 एप्रिल रोजी आझाद बगीच्यात मोफत प्रवेश दिला जाणार आहे
13 – चंद्रपूर लोकसभा मतदारसंघाची निवडणूक पहिल्या टप्प्यात म्हणजे 19 एप्रिल 2024 रोजी सकाळी 7 ते सायंकाळी 6 या वेळेत होणार आहे. या निवडणुकीत मतदानाची टक्केवारी वाढविण्यासाठी विविध प्रयत्न प्रशासनामार्फत केले जात आहे. त्याचाच एक भाग म्हणून नागरिकांच्या घरापर्यंत पोहचून ‘मतदार चिठ्ठी’ चे वाटप प्रशासनातर्फे करण्यात येत आहे.या मतदार चिठ्ठीद्वारे आपले नाव मतदार यादीत असल्याची खात्री करता येते तसेच मतदान केंद्र कुठे आहे याचीही माहिती मिळते.
या वाटपादरम्यान जर काही नागरिकांना मतदार चिट्ठी मिळाली नसेल तर त्यांना आपल्या बूथ लेव्हल ऑफिसरशी (बीएलओ) संपर्क करता येईल किंवा व्होटर हेल्पलाईन ॲपवर जाऊन व्होटर सर्विसेसमध्ये,नो युवर पोलिंग स्टेशन डिटेल्समध्ये जाऊन आपला व्होटींग कार्ड नंबर ( Epic Number ) टाकून माहिती करून घेता येईल. त्याचप्रमाणे https://electoralsearch.eci.gov.in/pollingstation या लिंकवर जावून माहिती करून घेता येईल किंवा चंद्रपूर
महानगरपालिकेच्या 18001237980 या टोल फ्री क्रमांकावर संपर्क करून मतदार चिठ्ठीबाबत माहिती घेता येईल.
तेव्हा सर्व नागरिकांनी १९ एप्रिल रोजी मतदान करून जागरूक नागरिकाचा हक्क बजावण्याचे आवाहन चंद्रपूर शहर महानगरपालिकेद्वारे करण्यात येत आहे.