चार दिवसीय शिक्षक प्रशिक्षण यशस्वीरीत्या पूर्ण
पवनी दि. 15:- खेळाच्या माध्यमातून मुलांचा शारीरिक व बौद्धिक विकास व्हावा या दृष्टीने जीवन कौशल्यविकास सत्र शाळेत राबविण्यासाठी चार दिवसांचे प्रशिक्षण मॅजिक बस इंडिया फाउंडेशनच्या वतीने घेण्यात आले.
शाळाबाह्य मुलांचे प्रमाण कमी व्हावे तसेच मुलांमध्ये जीवन जगण्याचे कौशल्य विकसित व्हावे या उद्देशांना घेऊन संस्था शाळांसोबत काम करत आहे. खेळाच्या माध्यमातून जीवन कौशल्य विकसित व्हावे यासाठी कोविड काळात सर्व नियमांचे पालन करुन गावागावात जाऊन संस्थेच्या शाळा सहाय्यक अधिकारी यांनी सत्र राबवून कोविड विषयक जनजागृती केली.
5 ते 8 जानेवारी दरम्यान पवनी तालुक्यातील सहावी ते नववीच्या वर्गातील प्रत्येक शाळेतून दोन शिक्षक याप्रमाणे तालुक्यातील एकूण 137 शिक्षकांचे प्रशिक्षण यशस्वीपणे पार पडले. यात पवनी तालुक्यातील एकूण अकरा केंद्रातील शिक्षक सहभागी होते. चार दिवसीय प्रशिक्षणात खेळातून शिक्षण- जीवन कौशल्य विकास याचे प्रशिक्षण तसेच प्रत्यक्ष प्रात्यक्षिक देखील करण्यात आले. कोविड संदर्भातील नियमानुसार सुरक्षित अंतर पाळले जावे या दृष्टीने एकूण चार केंद्रांवर प्रशिक्षण घेण्यात आले. चारही दिवस नियमित मॅजिक बस इंडिया फाउंडेशन च्या टीम कडून थर्मामीटर व ऑक्सीमीटर ने तपासणी करून हातांना सॅनिटायझर लावूनच प्रशिक्षण केंद्रात प्रवेश दिला जात होता.
प्रत्येक मुला-मुलींनी आपले शिक्षण पूर्ण करावे, मुलांनी स्वताच्या उपजीविकेचे साधन स्वतः निर्माण करणे. या उद्देशांवर स्केल प्रकल्पांतर्गत शिक्षक प्रशिक्षण घेण्यात आले. यात विकास हायस्कूल पवनी येथे बेटाळा, सावरला, भूयार येथील शिक्षक प्रशिक्षणास हजर होते. सावित्रीबाई फुले कन्या विद्यालय पवनी येथे न.प.पवनी, केंद्राचे शिक्षक उपस्थित होते. गांधी विद्यालय कोंढा येथे पिंपळगाव,आसगाव या केंद्रांचे शिक्षक तर प्रकाश विद्यालय अड्याळ येथे चिचाळ, नेरला या केंद्रातील शिक्षक उपस्थित होते.
प्रशिक्षण समारोपासाठी पवनी पंचायत समितीच्या गटविकास अधिकारी प्रमिलाताई वाळूंज उपस्थित होत्या. यावेळी शिक्षकांकडून प्रत्यक्ष प्रात्यक्षिक सादर करण्यात आले व येत्या काळात प्रकल्प यशस्वीरीत्या राबविण्यासाठी सहकार्य करू असे सांगण्यात आले. प्रशिक्षण यशस्वीरीत्या व्हावे यासाठी शिक्षण विभाग पंचायत समिती अंतर्गत चारही प्रशिक्षण केंद्रांवर सनियंत्रण अधिकारी यांची नेमणूक करण्यात आली होती. यासाठी गटशिक्षणाधिकारी नरेश टीचकुले, वरिष्ठ शिक्षण विस्तार अधिकारी विजय भुरे यांचे सहकार्य लाभले. यावेळी स्केल प्रकल्पाचे जिल्हा प्रकल्प व्यवस्थापक निकी प्रेमानंद, प्रशिक्षक अर्जुन काटे, मंगेश कांबळे, स्वप्नील जाधव, संदीप राऊत, छाया गुरव, तालुका व्यवस्थापक नंदू जाधव, तसेच शाळा सहाय्यक अधिकारी मोनाली धुर्वे, श्वेता येरमे, विलास मगरे, सुरज रापर्तीवार, रघुनाथ वानखडे, विशाल बोंबटकर तसेच समुदाय समन्वयक आदी उपस्थित होते.
