मुंबई – आगामी ऑस्ट्रेलिया दौ-यातील चार कसोटी सामन्यांच्या मालिकेसाठी भारतीय संघाची सोमवारी घोषणा झाली. ४ डिसेंबरपासून सुरू होणा-या कसोटी मालिकेत बंगळूरुचा फलंदाज के. एल. राहुलला कसोटी पदार्पणाची संधी देण्यात आली आहे.
ढोणी पहिल्या कसोटीला मुकणार
मनगटाला झालेल्या दुखापतीमुळे महेंद्रसिंग ढोणी ब्रिस्बेन येथे ४ डिसेंबरपासून सुरू होणा-या पहिल्या कसोटीला मुकणार आहे. त्याच्या अनुपस्थितीत विराट कोहली पहिल्या कसोटीत संघाचे नेतृत्व करेल. ढोणी मालिकेतील उर्वरित कसोटीसाठी मात्र उपलब्ध असल्याचे बीसीसीआयच्या निवड समितीने स्पष्ट केले. मनगटाच्या दुखापतीमुळे श्रीलंकेविरुद्धच्या उर्वरित दोन वनडेंसाठीही त्याचा विचार झालेला नाही.
भारताचा कसोटी संघ : महेंद्रसिंह ढोणी (कर्णधार), विराट कोहली, शिखर धवन, मुरली विजय, के. एल. राहुल, चेतेश्वर पुजारा, अजिंक्य रहाणे, रोहित शर्मा, सुरेश रैना, वृद्धिमान सहा, नमन ओझा, रवीचंद्रन अश्विन, कर्ण शर्मा, रवींद्र जडेजा, भुवनेश्वर कुमार, मोहम्मद शामी, इशांत शर्मा, उमेश यादव, वरुण आरोन.
उर्वरित दोन वनडेंसाठी संघनिवड रोहितचे पुनरागमन
श्रीलंकेविरुद्धच्या पाच वनडेंच्या मालिकेत ३-० विजयी आघाडी घेतल्याने उर्वरित दोन वनडेंसाठी काही मुख्य क्रिकेटपटूंना विश्रांती देण्यात आली आहे. याउलट दुखापतीतून सावरलेला मुंबईकर फलंदाज रोहित शर्माचे पुनरागमन झाले आहे. सलामीवीर शिखर धवन आणि फिरकीपटू रवींद्र जडेजाला विश्रांती देण्यात आली असून दुखापतग्रस्त इशांतचाही संघात समावेश करण्यात आलेला नाही. याउलट फलंदाज केदार जाधव आणि मध्यमगती गोलंदाज विनय कुमारचे संघाच पुनरागमन झाले आहे. ढोणीच्या अनुपस्थितीत कोहलीकडे संघाचे कर्णधारपद कायम आहे. भारत आणि श्रीलंका यांच्यातील चौथी वनडे गुरुवारी खेळण्यात येणार आहे. फलंदाज रॉबिन उथप्पाचेही संघात पुनरागमन झाले आहे.
भारताचा वनडे संघ : विराट कोहली (कर्णधार), अजिंक्य रहाणे, रोहित शर्मा, अंबाती रायडू, सुरेश रैना, रॉबिन उथप्पा, अक्सर पटेल, कर्ण शर्मा, रवीचंद्रन अश्विन, उमेश यादव, धवल कुलकर्णी, स्टुअर्ट बिन्नी, विनय कुमार, केदार जाधव.
