ज्योतिषाने केली भविष्यवाणी
नवी दिल्ली,(वृत्तसंस्था) – केंद्रीय मनुष्यबळ विकास मंत्री स्मृती इराणी मंत्रिपदाची शपथ घेतल्यापासून या ना त्या कारणांमुळे चर्चेत असून, आता त्या एका ज्योतिषाकडे आपले भविष्य बघताना दिसून आल्या. यामुळे त्या पुन्हा एकदा वादात अडकल्या आहेत. तसेच या ज्योतिषाने त्या एकेदिवशी भारताचा पंतप्रधान होतील, अशी भविष्यवाणी वर्तविल्याने त्या पुन्हा चर्चेत आल्या आहेत.
राजस्थानच्या भीलवडा परिसरातील प्रसिद्ध ज्योतिष पंडित नथ्थूलाल व्यास यांच्यासमोर हात दाखवून आपले भविष्य ऐकताना स्मृती इराणी दिसत आहेत. इराणी यांच्याकडे मनुष्यबळ विकास हे महत्त्वाचे खाते असून, त्यांच्याकडे शिक्षण क्षेत्राची जबाबदारी आहे. त्याच आपले भविष्य जाणून घेत असताना दिसल्यानंतर त्यांच्यावर टीका करण्यात येत आहे.
ज्योतिष नथ्थूलाल व्यास यांच्याकडे यापूर्वी ही इराणी गेल्या होत्या. त्यावेळी त्यांना राजकारणात मोठे पद मिळेल, असे त्यांनी सांगितले होते. आता, तर ज्योतिष व्यास यांनी इराणी यांनी एकेदिवशी नक्की पंतप्रधानपद मिळेल, असे सांगितले आहे.
