बुलढाणा : शेतकरी नेते रविकांत तुपकर यांच्या अटकेचे पडसाद जिल्ह्यात ठिकठिकाणी उमटले. मुख्य मार्गावर टायर जाळून रास्ता रोको करण्यात आला. पोलिसांनी तुपकरांच्या अनेक कार्यकर्ते व समर्थकांना स्थानबद्ध केले. चिखली तालुक्यातील पेठ व त्यापाठोपाठ खामगाव तालुक्यातील अनेक गावांत टायर जाळून वाहतूक अडविण्याचा प्रयत्न करण्यात आला. यावेळी, शासनाच्या निषेधार्थ घोषणा देण्यात आल्या.तुपकरांनी येत्या २९ तारखेला मंत्रालय ताब्यात घेण्याची घोषणा केली आहे. त्यासाठी ते २८ ला शेतकऱ्यांसह मुंबईकडे निघणार आहेत.
शेतकरी नेते रविकांत तुपकर यांना आज दुपारी कडक पोलीस बंदोबस्तात त्यांच्या राहत्या घरातून पोलिसांनी ताब्यात घेतले. त्यांना बुलढाणा शहर पोलीस ठाण्यात आणण्यात आले आहे. ठाणेदार प्रल्हाद काटकर यांच्या नेतृत्वात ही कारवाई करण्यात आली. शनिवारी दुपारी चिखली मार्गावरील तुपकर यांच्या निवासस्थान परीसरातील हालचाली वाढल्या. यानंतर पोलिसांचे एक पथक तिथे दाखल झाले.यावेळी तुपकर व अधिकाऱ्यात शाब्दिक चकमकी उडाल्या. यानंतर त्यांना शहर पोलीस ठाण्यात आणण्यात आले.शहरात देखील बंदोबस्त वाढविण्यात आला आहे. यापूर्वी सोयाबीन-कापूस उत्पादक शेतकऱ्यांच्या न्याय हक्काच्या मागण्यांसाठी तुपकर यांनी बुलढाण्यातील एल्गार मोर्च्यात थेट मंत्रालयाचा ताबा घेण्याचा गंभीर इशारा दिला होता. यावरून पोलिसांनी तुपकरांना नोटीस बजावली. मुंबईत आंदोलन करू नये अन्यथा कारवाई केली जाईल असे नोटीसमध्ये नमूद आहे.
