गडचिरोली/नागपूर: विदर्भाच्या औद्योगिक विकासाच्या दृष्टीने एक ऐतिहासिक आणि अत्यंत दिलासादायक बातमी समोर आली आहे. जेएसडब्ल्यू (JSW Group) समूहाचे अध्यक्ष सज्जन जिंदल यांनी गडचिरोली जिल्ह्यात तब्बल २५ दशलक्ष टन क्षमतेचा ‘एकात्मिक पोलाद कारखाना’ (Integrated Steel Plant) उभारण्याची भव्य योजना जाहीर केली आहे. नक्षलवादाचे सावट ओसरल्यानंतर आणि परिसरात शांतता प्रस्थापित झाल्यानंतर गडचिरोलीच्या विकासाचे नवे पर्व सुरू झाले आहे.
सज्जन जिंदल यांनी नागपूर येथे माध्यमांशी संवाद साधताना सांगितले की, “गडचिरोली हा जिल्हा लोहखनिजाच्या खाणींच्या अत्यंत जवळ असल्याने स्टील निर्मितीसाठी अत्यंत धोरणात्मक आहे. नैसर्गिक साधनसंपत्तीने समृद्ध असलेला हा भाग आता उद्योगांसाठी सुरक्षित झाला आहे. प्रकल्पासाठी लागणारा कच्चा माल आणि सुरक्षा व्यवस्था सुनिश्चित होताच, प्रत्यक्ष कामाला गती दिली जाईल.” या प्रकल्पामुळे गडचिरोली आणि चंद्रपूर जिल्ह्यातील हजारो स्थानिक तरुणांना रोजगाराच्या मोठ्या संधी उपलब्ध होणार आहेत.
नागपुरात ई-व्हीकल बॅटरी प्लांट
केवळ पोलादच नव्हे, तर ‘इलेक्ट्रिक मोबिलिटी’ क्षेत्रातही जेएसडब्ल्यू समूह मोठी गुंतवणूक करत आहे. पंतप्रधान नरेंद्र मोदी यांच्या ‘आत्मनिर्भर भारत’ स्वप्नाला बळ देण्यासाठी, कंपनी नागपूर येथे इलेक्ट्रिक वाहनांसाठी लागणाऱ्या सेल्स आणि बॅटरी निर्मितीचा प्रकल्प उभारणार आहे. हा प्रकल्प देशाची इंधन आयात कमी करण्यास आणि पर्यावरणाचे रक्षण करण्यास महत्त्वपूर्ण ठरेल.
नक्षलवादाच्या छायेतून बाहेर पडत आता गडचिरोली जिल्ह्याने औद्योगिक प्रगतीची वाट धरली असून, या मोठ्या गुंतवणुकीमुळे विदर्भाच्या अर्थव्यवस्थेला नवी झळाळी मिळणार आहे.
