गडचिरोली- एका गुन्ह्याच्या तपासात मदत करण्याकरिता, तसेच ट्रकने खनिजाची वाहतूक विनाअडथळा करु देण्यासाठी एका वाहतूकदाराकडून १ लाख रुपयांची लाच स्वीकारताना चंद्रपूर येथील लाचलुचपत प्रतिबंधक विभागाच्या अधिकार्‍यांनी आज अहेरी येथील पोलिस ठाण्याचे ठाणेदार श्याम गव्हाणे यांना रंगेहाथ पकडून अटक केली. या घटनेमुळे पोलिस विभागात एकच खळबळ माजली आहे.
चंद्रपूर एसीबीने दिलेल्या माहितीनुसार, तक्रारकर्ता हा अहेरीनजीकच्या नागेपल्ली येथील रहिवासी असून, तो गौण खनिजाची ट्रकद्वारे वाहतूक करतो. एका प्रकरणात त्याच्यावर अहेरी पोलिस ठाण्यात गुन्हा दाखल आहे. सध्या तो सुरजागड येथील लोहखाणीतून ट्रकद्वारे कच्च्या लोखंडाची वाहतूकही करीत आहे. परंतु ही वाहतूक विनाअडथळा करु देण्यासाठी आणि दाखल गुन्ह्यात मदत करण्यासाठी ठाणेदार श्याम गव्हाणे यांनी तक्रारकर्त्यास १ लाख रुपयांची लाच मागितली. परंतु लाच देण्याची तक्रारकर्त्यांची मुळीच इच्छा नसल्याने त्याने चंद्रपूर येथील लाचलुचपत प्रतिबंधक विभागाकडे तक्रार केली. त्यानुसार आज संध्याकाळी ४ वाजताच्या सुमारास या विभागाच्या अधिकार्‍यांनी सापळा रचला असता पोलिस ठाण्याच्या आवारात उभ्या असलेल्या शासकीय वाहनात १ लाख रुपये घेताना ठाणेदार गव्हाणे यांना रंगेहाथ पकडून अटक केली.
सदर कारवाई नागपूरचे पोलिस उपायुक्त राकेश ओला, अपर पोलिस अधीक्षक मुधकर गिते, चंद्रपूर पोलिस उपअधीक्षक अविनाश भामरे यांच्या मार्गदर्शनाखाली पोलिस निरीक्षक शिल्पा भरडे यांच्या नेतृत्वात नरेश नन्नावरे, संदेश वाघमारे, रवीकुमार ढेंगळे, वैभव गाडगे, सतीश सिडाम यांनी ही कारवाई केली.
