गोंदिया,दि.२२– परवानगीपेक्षा अधिक क्षमतेत वाळूचा उपसा करुन त्याचे वहन केल्याप्रकरणी देवरी तालुक्यातील रहिवासी असलेले ठेकेदार अनिल बिसेन यांच्यावर तहसिलदार आमगाव यांनी १४ लाख १ हजार ३०० रुपयाचा दंड ठोठावला आहे.महाराष्ट्र जमिन महसुल अधिनियम १९६६ च्या कलम ४८(७)अंतर्गत १०३८ ब्रास गौण खनिज उत्खननकेल्याने ३० दिवसाच्या आत ही दंडाची रक्कम शासन जमा करण्यास सांगण्यात आले असून दंडाची रक्कम मुदतीच्या आत न भरल्यास अनिल बिसेन हे कारवाईस पात्र राहणार असल्याचे आपल्या आदेशात आमगाव तहसिलदार डी.एस.भोयर यांनी म्हटले आहे.बिसेन यांनी लिलावात खरेदी केलेला वाळू साठा १०० ब्रास एवढा असतांना चौकशी दरम्यान मात्र १०३८ ब्रासचे उत्खनन झाल्याचे समोर आले.ज्यांच्याशेतामध्ये हा वाळू साठा आहे,त्या शेतकèयांना १९ मे रोजी चौकशीसाठी बोलावण्यात आले होते.
सविस्तर असे की,ठेकेदार अनिल बिसेन यांनी आपण आमगाव तालुक्यातील वळद येथे आपल्या शेतात फळझाडे लावण्याकरीता सरपंच किशोर रहांगडाले यांच्या नर्सरीत गेलो असता त्यांनी आपल्या ग्रामपंचायत क्षेत्रात जप्त करण्यात आलेला वाळूसाठाच्या लिलाव आहे.आपणास वाळू खरेदी करावयाची असेल तर १३ मे रोजी दुपारी लिलावाकरीता अधिकची बोली लावून विकत घ्या असे सांगितले.त्यामुळे मी ५ हजार रुपयाची अनामत रक्कम भरुन लिलावात सहभाग घेतला.या लिलावात आपल्याव्यतिरिक्त इतर ३ जणांनी सहभाग घेतला होता.आपली बोलीची रक्कम सर्वाधिक असल्याने लिलाव मला मिळाले.आणि लिलावाची रक्कम १ लाख ४६ हजार ३६० रुपये चालानच्या माध्यमातून बँकेत जमा करुन वाहतुक परवाना घेतला.वाहतुक साठ्याच्या परवान्याप्रमाणे १५ ते २२ मे पर्यंत दोन ट्रक्टर व एका टिप्परद्वारे वाहतुक करावयाचे होते त्यानुसारच आपण वाळूची वाहतुक करीत होतो.इतर कुठल्याही वाळूचा उपसा न करताच लिलावाच्या वाळूचीच वाहतुक करीत असल्याचे चौकशीदरम्यान बिसेन यांनी बयाणात सांगितले.मात्र तक्रारीच्या आधारावर वळद येथील मौकाचौकशी करण्यात आली असता सदर जागेतून १०३८ ब्रास वाळूचे अवैध उत्खनन करण्यात आल्याचे उघडकीस आल्याने बिसेन यांच्यावह १४ लाखाचा दंड ठोठावण्यात आलेला आहे.
