नवी दिल्‍ली,दि. 5:केंद्रीय लोकसेवा आयोगाच्या परीक्षेत देशातील एकूण 829 यशस्वी उमेदवारांपैकी महाराष्ट्रातील 90 हून अधिक उमदेवारांनी यश संपादन केले आहे. राज्यातून अभिषेक सराफ हा प्रथम तर नेहा भोसले दुसऱ्या क्रमांकावर आहे. देशभरातील गुणानुक्रमानुसार हे दोघे आठव्या आणि पंधराव्या स्थानावर आहेत.
केंद्रीय लोकसेवा आयोगाचा वर्ष 2019 च्या परीक्षेचा अंतिम निकाल आज जाहीर झाला. या निकालात पहिल्या 100 उमेदवारांमधे महाराष्ट्रातील 5 उमेदवारांचा समावेश आहे. यात गुणानुक्रमे 8 व्या स्थानावर अभिषेक सराफ, नेहा भोसले 15 व्या स्थानावर,मंदार पत्की 22 व्या स्थानावर, आशुतोष कुलकर्णी 44 व्या स्थानावर, योगेश पाटील 63 व्या स्थानावर, विशाल नरवाडे 91 व्या स्थानावर, आहेत. दिव्यांगामधून राज्यातील जयंत मंकले हे 143 व्या स्थानावर आहेत.
जयंत मंकलेंची अंधत्वावर मात : केंद्रीय लोकसेवा आयोगात 143 क्रमांक
पुण्याचा जयंत मंकले या दिव्यांग उमेदवाराने केंद्रीय लोकसेवा आयोगाच्या वर्ष 2019 च्या परीक्षेत 143 वा क्रमांक मिळविला आहे. या आधी जयंतने 2018 मध्ये ही लोकसेवा आयोगाची परिक्षा दिली होती, त्यावेळी त्याचा क्रमांक 937 होता. यावेळी पुन्हा प्रयत्न करीत 143 वा क्रमांक मिळविला.
महाराष्ट्रातील महिला उमेदवारांनीही मारली बाजी
यंदाच्या केंद्रीय लोकसेवा आयोगाच्या निकालात महाराष्ट्रातील 12 महिला उमेदवारांनी बाजी मारली आहे. या मध्ये नेहा भोसले यांना देशभरातील गुणांनुक्रमानुसार 15 वे स्थान मिळाले आहे तर महाराष्ट्रातून त्या पहिल्या ठरल्या आहेत. याशिवाय नेहा दिवाकर देसाई (137), अश्विनी तानाजी वाकडे (200), गौरी पुजारी (275), नेहा किरडक (383), डॉ.प्रणोती संजय संकपाल (501), अंकिता अरविंद वाकेकर (547), पुनम प्रकाशराव ठाकरे (641), प्रियंका कांबळे (670), प्रज्ञा खंडारे (719), अनन्या किर्ती (736).
एक नजर निकालावर
केंद्र शासनाच्या विविध सेवांमधील रिक्त जागांसाठी 2019 मध्ये परीक्षा घेण्यात आली. कोरोनाच्या प्रादुर्भावामुळे मुलाखती घेण्यास यावर्षी उशीर झाला. लेखी परीक्षा उत्तीर्ण झालेल्या उमेदवारांची यावर्षीच्या फेब्रुवारी ते जुलै या महिन्यात मुलाखत घेण्यात आली. या परीक्षेच्या निकालातील उत्तीर्ण 829 उमेदवारांची केंद्रीय लोकसेवा आयोगाने विविध सेवेतील पदांच्या नियुक्तीसाठी शिफारस केली आहे. यामध्ये सामान्य (ओपन) गटातून –304, आर्थिक मागास प्रवर्गातून (ईडब्ल्यूएस)78, इतर मागासवर्गीय प्रवर्गातून(ओबीसी) – 251, अनुसूचित जाती प्रवर्गातून (एससी) – 129, अनुसूचित जमाती प्रवर्गातून – 67 उमेदवारांचा समावेश आहे. एकूण यशस्वी उमेदवारांमध्ये 60 शारिरीकरित्या दिव्यांग उमेदवारांचा समावेश आहे. लोकसेवा आयोगाने 182 उमेदवारांची आरक्षित सूची (Reserve List) तयार केली आहे. यामध्ये सामान्य गट- 91, आर्थिक मागास प्रवर्ग (ईडब्ल्यूएस)-09, इतर मागास वर्ग -71, अनुसूचित जाती- 08, अनुसूचित जमाती – 03 उमेदवारांचा समावेश आहे.
भारतीय प्रशासन सेवा (आय.ए.एस.) या सेवेत शासनाकडे एकूण -180 जागा रिक्त आहेत. यामध्ये सामान्य गट (जनरल) – 72, आर्थिक मागास प्रवर्ग(ईडब्ल्यूएस) 18 इतर मागास वर्ग (ओ.बी.सी.) –52, अनुसूचित जाती (एस.सी.) –25, अनुसूचित जमाती (एस.टी.) – 13 जागा रिक्त आहेत. गुणाणूक्रमे रिक्त जागांवर यशस्वी उमेदवारांची निवड केली जाणार आहे.
भारतीय विदेश सेवा (आय.एफ.एस.) या सेवेत शासनाकडे एकूण – 24 जागा रिक्त आहेत. यामध्ये सामान्य गट (ओपन) – 12, आर्थिक मागास प्रवर्ग(ईडब्ल्यूएस) 02, इतर मागास वर्ग (ओ.बी.सी.) – 06, अनुसूचित जाती (एस.सी.) – ०3, अनुसूचित जमाती (एस.टी.) – 01 जागा रिक्त आहेत.
भारतीय पोलिस सेवा (आय.पी.एस.) या सेवेमध्ये एकूण – 150 जागा रिक्त आहेत, यामध्ये सामान्य गटातून (ओपन) – 60, उमेदवार आर्थिक मागास प्रवर्ग(ईडब्ल्यूएस) 15, इतर मागास प्रवर्गातून – 42, अनुसूचित जाती प्रवर्गातून – 23, तर अनुसूचित जमाती प्रवर्गातून – 10 उमेदवारांना नियुक्ती दिली जाणार आहे.
केंद्रीय सेवा गट अ – या सेवेमध्ये एकूण – 438 जागा रिक्त आहेत. यामध्ये सामान्य गटातून (ओपन) – 196 उमेदवार, आर्थिक मागास प्रवर्ग(ईडब्ल्यूएस) 34, इतर मागास प्रवर्गातून – 109, अनुसूचित जाती प्रवर्गातून – 64 तर अनुसूचित जमाती प्रवर्गातून – 35 उमेदवारांना नियुक्ती दिली जाईल.
केंद्रीय सेवा गट ब – या सेवेमध्ये एकूण – 135 जागा रिक्त आहेत. यामध्ये सामान्य गटातून (ओपन) -57, आर्थिक मागास प्रवर्ग(ईडब्ल्यूएस) 14 उमेदवार, इतर मागास प्रवर्गातून – 42, अनुसूचित जाती प्रवर्गातून – 14 तर अनुसूचित जमाती प्रवर्गातून – 08 उमेदवारांना नियुक्ती दिली जाईल.
या परीक्षेत यश मिळविणाऱ्या महाराष्ट्रातील उमेदवारांमध्ये यांचा समावेश आहे. –
अभिषेक सराफ (8), नेहा प्रकाश भोसले (15), मंदार जयवंतराव पत्की (22), आशुतोष कुलकर्णी (44), दिपक करवा (48), योगेश अशोकराव पाटील (63), विशाल तेजराव नरवडे (91), मयुर खंडेलवाल (106), राहूल लक्ष्मण चव्हाण (109), विनोद पाटील (132), कुलदिप जंगम (135), नेहा दिवाकर देसाई (137), जयवंत किशोर मनकाळे (143), अभयसिंह बाळासाहेब देशमुख (151), शेख मोहमद झेब झाकीर (153), अश्विनी तानाजी वाकडे (200), सागर भारत मिसाळ (204), माधव विठ्ठलराव गित्ते (210), कुणाल मोतीराम चव्हाण (211), सचिन हिरेमठ (213), सुमित महाजन (214), श्रेणिक लोढा (221), अविनाश शिंदे (226), शंकर गिरी (230), श्रीकांत खांडेकर (231), योगेश कापसे (249), आयुष खरे (267), गौरी पुजारी (275), गजराज बच्छावत (277), शंतनु अत्रे (281), प्रसाद शिंदे (287), रजनिश पाटिदार (307), आकाश अग्ले (313), मंदार देशपांडे (334), रजत उभयकर (378), आदित्य काकडे (382), नेहा किरडक (383), निमिश पाटील (389), महेश गिते (399), अभिषेक शिवहरे (414), कांतीलाल सुभाष पाटील (418), अमित कुमावत (423), अविनाश जगधवर (433), परमानंद प्रविण दराडे (439), स्वप्नील पवार (448), ऋषिकेश जयसिंग देसाई (481), नकुल राजेंद्र देशमुख (489), शुभ्रमण्य भालचंद्र केळकर (497), डॉ.प्रणोती संजय संकपाल (501), सुमित कैलास जगताप (507), दिपक धनखेर (520), प्रसन्न लोढा (524), नवनाथ शिवाजी माने (527), प्रफुल्ल देसाई (532), वैभव हिरवे (541), अंकिता अरविंद वाकेकर (547), विजयसिंहराव साहेबराव गिते (550), समिर प्रकाश खोडे (551), सुरेश कैलासराव शिंदे (574), अभिनव प्रविण इंगोळे (624), अजय गणपती कुंभार (630), स्वप्नील जगन्नाथ पवार (635), अभिषेक दिलीप दुधाळ (637), पुनम प्रकाशराव ठाकरे (641), अशित कांबळे (651), करूण गरड (656), प्रियंका कांबळे (670), ऋषिकेश देशमुख (688), सौरभ व्हटकर (695), अक्षय भोसले (704), अभिजीत सरकटे (710), प्रज्ञा खंडारे (719), साकेत धवने (727), निखिल दुबे (733), राजीव मेश्राम (735), अनन्या किर्ती (736), शशांक माने (743), निखील कांबळे (744), सुमित रामटेके (748), शुभम भैसारे (749), निलेश गायकवाड (752), कुणाल उत्तम शिरोटे (765), वैभव वाघमारे (771), अश्विन गोलपकर (773), विधित्या नायक (780), किशोर सुत्रधार (784), सरगम शिंदे (785), सर्वेश सोनवाणी (787), अजिंक्य विद्यागर (789), सत्यजित यादव (801), समिर महाजन (810), सुनिल शिंदे (812), हेमंत नंदनवार (822), स्वरूप दिक्षित (827). यापैकी यशस्वी झालेल्या 66 उमेदवारांची निवड तात्पुरती आहे.
स्पर्धा परीक्षेकडे फक्त परीक्षा म्हणून न पाहता आपल्यातील क्षमता ओळखून नियोजन करणं आवश्यक आहे. युपीएससी परीक्षा ही खूप अवघड नाही. सर्व साामान्य बुद्ीमत्तेचे व्यक्ती देखील ही परीक्षा जिद्दीने यशस्वी होवू शकतात. त्यासाठी दिल्लीला जाण्याची गरज नाही. संयम ठेवून नियोजन करा. असे मत पहिल्याच प्रयत्नात यशस्वी ठरलेल्या नेहा किर्दक आणि सुमित महाजन या मंगळवारी जाहिर झालेल्या युपीएससी परीक्षेतील यशस्वी तरुणांनी असे मत व्यक्त केले.
नागरी सेवा परीक्षा २०१९ चा निकाल केंद्रीय लोकसेवा आयोगाकडून (युपीएससी) मंगळवारी जाहीर करण्यात आला. या परीक्षेत प्रदीप सिंह देशात पहिला आला आहे. तर महाराष्ट्रातून अभिषेक सराफ पहिला आला आहे. युपीएससी सिव्हिल सर्व्हिसेस साठी झालेल्या या परीक्षेत देशभरातून ८२९ उमेदवारांची निवड झाली आहे.
लाखो उमेदवार ज्यांना आयएएस, आयपीएस अधिकारी व्हायची इच्छा असलेले तरुण-तरुणी केंद्रीय लोकसेवा आयोगाची परीक्षा देतात. ही परीक्षा देशातील सर्वात आव्हानात्मक स्पर्धा परीक्षा मानली जाते. यंदा या निवड झालेल्या उमेदवारांपैकी ३०४ जनरल कॅटेगिरीतील, ७८ (ईडब्ल्यूएस), २५१ ओबीसी, १२९ अनुसूचित जाती आणि ६७ अनुसूचित जमाती कॅटेगिरीतील आहे. औरंगाबाद शहरातील नेहा लक्ष्मण किर्दक ही तरुणी पहिल्याच प्रयत्नात युपीएससी परीक्षेत यशस्वी ठरली असून, तिचा ३८३ वा रँक आला आहे. तर सुमित राजेश महाजनने २१४ वा रँक मिळवला असून, त्याचा हा अखेरचा अटेंम्पट होता.
औरंगाबादची नेहा पहिल्याच प्रयत्नात यशस्वी
शहरातील नेहा लक्ष्मण किर्दक हिचा ३८३ रँक आला आहे. नेहाने सांगितले की, तिचा हा पहिलाच प्रयत्न होता. तिने कुठेही क्लासेस न लावता सर्व तयारी ही ऑनलाइन केली होती. नेहा एमबीबीएस असून, लहान पणापासून सनदी अधिकारी होण्याचे स्वप्न होते. बाबांचे देखील स्वप्न होते. आज त्यांचे हे स्वप्न मी पूर्ण करु शकले याचा आनंद आहे. आज मिळालेले श्रेय हे माझे आई-बाबांमुळे आहे. माझ्या अभ्यासाचे नियोजन व्हावे म्हणून स्वत:च काम थांबवून बाबांनी त्यांची पाच वर्ष माझ्यासाठी पूर्ण वेळ दिला. मी सुरक्षित रहावे, अभ्यासची नीट तयारी करावी यासाठी ते कायम माझ्या सोबत असतं असे नेहा म्हणाली. गर्व्हमेंट मेडिकल कॉलेजमधून एमबीबीएस झालेल्या नेहाचे शालेय शिक्षण हे शारदा मंदिर कन्या प्रशालेतून झाले आहे. नेहाची आई आशा किर्दक या शिशु विहार शाळेत शिक्षक आहेत. आज मोठ्या प्रमाणात मेडिकल आणि इंजिनिअरिंग केलेले तरुण स्पर्धा परीक्षेकडे वळत आहेत. याविषयी नेहा म्हणाली की मेडिसन इज नॉट कंम्प्लिट स्लयूशन असं मला वाटत. मी डॉक्टर म्हणून जीव वाचवेल. परंतु प्रशासकीय यंत्रणेच्या हाती भविष्य वाचविण्यासाठी सुधारणा करण्याचे काम आहे. त्यामुळे आवडीने मी २०१८ मध्ये युपीएससीची तयारी सुरु केली होती. युपीएससी खूप अवघड नाही. अभ्यासाचे नियोजन हवं. ते मी कॉलेज करतांनाच केले. रोज सात ते आठ तास नियमित वर्षभर अभ्यासासाठी वेळ देण आवश्यक आहे. मी ८० टेस्टचा सराव प्रिलियमपूर्वी केला होता. स्पर्धा परीक्षेच्या तयारीसाठी दिल्लीला जाण्याची गरज नाही. तुमच्यात जिद्द आणि नियोजन हवे. तुम्ही कुठे कमी आहात यावर लक्ष द्या ध्ययेय विसरता कामा नये असेही नेहा म्हणाली. आता आयपीएस किंवा आयआरएस मिळू शकते पण माझी आवड ही आयपीएस आहे असेही नेहा म्हणाली. युपीएससी टॉपर झालेल्या नेहाला पेंंटींग, कवीता लेखन, डायरी लेखन आणि ब्लॉग लिहिण्याची आवड आहे.
चुकांमधून शिकलो संयम हवा – सुमित महाजन
स्पर्धा परीक्षेकडे केवळ स्पर्धा परीक्षा म्हणून पाहू नका. आपल्यातील उणीवांवरही लक्ष देवून त्या चुका दुरुस्त करा. कोणत्याही यशासाठी संयम खूप आवश्यक आहे. माझा हा शेवटचा अटेंप्मट होता. मी तीनवेळा मुलाखतीला सामोरे गेलो तर सहा वेळा लेखी परीक्षा. थोड्या थोड्या गुणांनी संधी जात होती. नाराज होत होतो पण खचलो नाही. जिद्दीने संयम बाळगत चुकांमधून शिकलो त्यामुळेच आज हे यश मिळाल्याचे मत, शहरातील सुमित महाजनने बोलतांना व्यक्त केले. त्याचा २१४ वा रँक आला आहे. सुमितने व्हीजेटीआयमधून बीटेक केले आहे. तर त्याचे शालेय शिक्षण हे संत मीरा विद्यालयातून झाले आहे. कॉलेज कँम्पस मध्ये नोकरीची संधी मिळाली होती. पण माझी इच्छा खुनावत होती. मी स्पर्धा परीक्षांची तयारी सुुरु केली. स्पर्धा परीक्षेची तयारी करतांना सुरुवातीला फारसा अंदाज येत नाही. पण तयारी करतांना तुमचा ग्रृप देखील चांगला हवा. माझी सर्व परीक्षेची तयारी मी पुण्यात केली. आठ ते दहा तास अभ्यासक करायचो. तो अभ्यास हा क्वॉलिटी प्रिपरेशन होता. सुरुवातीला काही चुका झाल्या होत्या. त्यामुळे एक दोन गुणांनी संधी हुकली माझी मुलाखतीची ही तिसरी वेळ होती. शेवटचा अटेंम्पट होता. त्यामुळे निकालाकडे लक्षही होते. लॉकडाऊनमुळे प्रक्रिया लांबेल असे वाटले होते. कारण माझा इंटरव्ह्यूव्ह हा फेब्रुवारीत झाला आणि काहीच्या मुलाखतीचे वेळापत्रक थांबवले होते. पण आज निकाल आला. नियोजनामुळे आणि चुकांवर काम केल्यामुळे हे यश मिळाले आहे. असेही सुमित म्हणाला. क्रिकेटची, तबल्याची आवड असलेल्या सुमितला एम.एस. धोनी आवडतो. त्याचा खेळ हा प्रोत्साहित करत असल्याचेही तो म्हणाले. स्पधा परीक्षेची तयारी करणाऱ्या तरुणांनी नियोजन, संयम आणि चुकांवर काम करण्याची तयारी ठेवावी. असेही सुमित म्हणाला. सुमितचे वडिल राजेश महाजन हे जि.प. शिक्षण विस्तार अधिकारी असून, आई ग्रृहिणी आहे. त्याला एक भाऊ आणि एक बहिण आहे.
औरंगाबादची अंकिता देशात 547 व्या स्थानी
सिव्हिल इंजिनिअर असलेल्या अंकिता अरविंद वाकेकर हिला युपीएससीमध्ये ५४७ वा रँक मिळाला आहे. मुळ औरंगाबादची असलेल्या अंकिताचे शिक्षण हे नाशिक मध्ये झाले असून, सिव्हिल इंजिनिअरिंग व्हिजेटीआय मुंबई येथून केले आहे. सध्या नाशिक येथेच रहायला आहे. असलेल्या अंकिताने युपीएससीची संपूर्ण तयारी दिल्लीत केल्याचे सांगितले हा आपला तिसर अटेंम्ट होता. स्पर्धा परीक्षेची तयारी करतांना संयम आणि नियोजन आवश्यक आहे. असेही अंकिता म्हणाली. अंकिताची आई ही नायाब तहसीलदार असून वडिल इंजिनिअर आहेत.
अधिकृत निकाल व यशस्वी उमदेवारांची नांवे केंद्रीय लोकसेवा आयोगाच्या http://www.upsc.gov.in या संकेतस्थळावर उपलब्ध आहेत.
