अकोला : काँग्रेस पक्षाचा आतापयर्ंत कटू अनुभव लक्षात घेता आगामी स्थानिक स्वराज्य संस्था तसेच विधान परिषदेच्या निवडणुकीसाठी कार्यकर्त्यानी आतापासूनच स्वबळावर कामाला लागावे, असे संकेत राष्ट्रवादी काँग्रेसचे ज्येष्ठ नेते खा. प्रफुल्ल पटेल यांनी रविवारी येथे केले. राष्ट्रवादी पक्षाचे जेवढे नुकसान काँग्रेसने केले, तेवढे कोणीही केले नाही. माजी मुख्यमंत्री पृथ्वीराज चव्हाण यांनी राष्ट्रवादीची बदनामी करण्याची कोणतीच कसर सोडली नाही. ‘खुद तो डुबे सनम, हमको भी ले डुबे’ अशा पद्धतीची काँग्रेसची राकाँसोबत खेळी राहीली, असे टीकास्त्र प्रफुल्ल पटेल यांनी काँग्रेसवर सोडले.
महेश भवनात खा. प्रफुल्ल पटेल यांच्या उपस्थितीत राष्ट्रवादीचा जिल्हा कार्यकर्ता मेळावा आयोजित करण्यात आला होता. त्यावेळी ते बोलत होते. खा. पटेल म्हणाले की, काँग्रेसशिवाय दलित आणि अल्पसंख्याकांना दुसरा पर्याय नाही असा या पक्षाचा गैरसमज आहे. परंतु प्रत्यक्षात मात्र तसे नाही. अल्पसंख्याकाच्या प्रश्नावर राष्ट्रवादीने वेळप्रसंगी संघर्षही केला आहे. ही बाब सलत असल्यामुळे काँग्रेसने राष्ट्रवादीचे नेहमीच पाय ओढले आहे. आगामी स्थानिक स्वराज्य संस्था निवडणुका तोंडावर असून कार्यकर्त्यांनी आतापासूनच 8कामाला लागावे.
