- आरोग्य कर्मचारी, आशा कर्मचाऱ्यांचे केले कौतुक
वाशिम, दि. २६ : जिल्ह्यात आज, २६ मार्चपासून आरोग्यवर्धिनी उपकेंद्रांवर कोरोना प्रतिबंधक लसीकरण मोहिमेस सुरुवात झाली. या लसीकरण मोहिमेचा आढावा घेण्यासाठी जिल्हाधिकारी षण्मुगराजन एस. यांनी मंगरूळपीर तालुक्यातील तऱ्हाळा येथील आरोग्यवर्धिनी उपकेंद्राला भेट देवून तेथील लसीकरण मोहिमेचा आढावा घेतला.
यावेळी उपविभागीय अधिकारी राम मुळे, गट विकास अधिकारी श्री. परिहार, तालुका आरोग्य अधिकारी डॉ. नीना बोराडे, सरपंच सौ. प्रियांका महल्ले, उपसरपंच शीला भगत, वनोजा प्राथमिक आरोग्य केंद्राचे वैद्यकीय अधिकारी डॉ. विजय काळे यांची प्रमुख उपस्थिती होती.
जिल्हाधिकारी षण्मुगराजन एस. यांनी यावेळी लसीकरणाला आलेल्या नागरिकांशी संवाद साधला. तसेच कोरोना प्रतिबंधक लस पूर्णतः सुरक्षित असून आपल्या परिसरातील इतर नागरिकांना सुद्धा ही लस घेण्यास सांगावे, असे आवाहन त्यांनी उपस्थितांना केले. तऱ्हाळा येथील आशा सेविका, आरोग्य कर्मचारी यांनी गावामध्ये जनजागृती केल्यामुळे पहिल्याच दिवशी लसीकरण मोहिमेला चांगला प्रतिसाद मिळाल्याबद्दल जिल्हाधिकाऱ्यांनी आशा सेविका व आरोग्य कर्मचाऱ्यांचे कौतुक केले. तसेच आगामी १५ दिवसांत उपकेंद्र क्षेत्रातील सर्व पात्र व्यक्तींचे लसीकरण पूर्ण करून घ्यावे, असे सांगितले.
जिल्हाधिकारी षण्मुगराजन एस. यांनी यावेळी मंगरूळपीर तालुक्यातील लसीकरण मोहिमेचा आढावा घेतला. तसेच कोरोना संसर्गापासून ६० वर्षांवरील व्यक्तींना अधिक धोका असल्यामुळे या वयोगटातील व्यक्तींचे तसेच ४५ वर्षांवरील दीर्घ आजार असलेल्या व्यक्तींचे लसीकरण करण्यासाठी प्रयत्न करण्याच्या सूचना केल्या. याकरिता ग्रामस्तरीय अधिकारी, कर्मचारी, शिक्षक व पदाधिकारी यांची माहिती घेवून जास्तीत जास्त लोकांपर्यंत लसीकरणाची माहिती पोहचवावी, असे त्यांनी सांगितले.
जिल्हाधिकाऱ्यांनी तऱ्हाळा येथे घेतला लसीचा दुसरा डोस
जिल्हाधिकारी षण्मुगराजन एस. यांनी एक महिन्यापूर्वी कोरोना लसीचा पहिला डोस वाशिम येथील जिल्हा सामान्य रुग्णालयात घेतला होता. त्यानंतर आज तऱ्हाळा येथील आरोग्य उपकेंद्रातील लसीकरण मोहिमेची पाहणी करण्यासाठी आलेल्या जिल्हाधिकाऱ्यांनी याठिकाणी लसीचा दुसरा डोस घेतला. तसेच कोरोना लस पूर्णतः सुरक्षित असून सर्व पात्र व्यक्तींनी ही लस घ्यावी, असे आवाहन त्यांनी केले.
