दीपाली चव्हाण आत्महत्या प्रकरण
अमरावती,दि 27- मेळघाटातल्या गुगामलच्या वनपरिक्षेत्र अधिकारी दीपाली चव्हाण-मोहिते यांच्या आत्महत्या प्रकरणी अटक करण्यात आलेल्या उपवनसंरक्षक विनोद शिवकुमार यांची शनिवारी धारणी न्यायालयाने 29 मार्चपर्यंत पोलिस कोठडीत रवानगी केली आहे. दरम्यान वन विभागातल्या महिला कर्मचार्‍यांनी व भाजपाच्या महिला कार्यकर्त्यांनी पोलिस ठाण्यासमोर शिवकुमार याच्या विरोधात निदर्शने करून त्याचा फोटो जाळत नारेबाजी केली.
दीपाली यांनी गुरुवारी रात्री हरिसाल येथील शासकीय निवासस्थानी स्वत:वर गोळ्या झाडून आत्महत्या केली होती. मृत्यूपूर्वी त्यांनी चार पानांची सुसाईड नोट लिहली होती. त्यात दीपाली यांनी उपवनसंरक्षक विनोद शिवकुमार यांच्या आर्थिक व मानसिक त्रासाला कंटाळून आत्महत्या करीत असल्याचे नमुद करून अन्य गंभीर आरोप केले होते. धारणी पोलिसांनी प्रकरणाची गंभीर दखल घेऊन गुरुवारी मध्यरात्रीनंतर दिपालीचे पती राजेश मोहिते यांच्या तक्रारीवरून शिवकुमार यांच्यावर गुन्हा दाखल करून त्याचा शोध सुरू केला होता. शुक्रवारी त्याला फरार होत असताना नागपूर रेल्वे स्थानकावरून अटक करण्यात आली. त्यानंतर त्याला धारणी पोलिस ठाण्यात आणण्यात आले. रात्रभर त्याची कसून चौकशी केल्यानंतर पोलिसांनी शनिवारी दुपारी 1 वाजताच्या दरम्यान त्याला न्यायालयात हजर केले. न्यायालयाने त्याची 29 मार्च पर्यंत पोलिस कोठडीत रवानगी केली आहे.
शिवकुमारला न्यायालयात नेणार असल्याची माहिती भाजपाच्या नगरसेविका क्षमा चौकसे व महिला पदाधिकार्‍यांना आणि वन विभागातल्या महिला कर्मचार्‍यांना मिळताच त्यांनी पोलिस ठाण्यावर धडक दिली. शिवकुमारचा फोटो जाळत संतप्त महिलांनी मुर्दाबादचे नारे लावून त्याला फाशीची शिक्षा द्या, श्रीनीवास रेड्डी यांना सहआरोपी करून निलंबित करा, तसेच शिवकुमारला पोलिस वाहनातून न्यायालयात न नेता पायदळ नेण्याची मागणी क्षमा चौकसे, वर्षा जैस्वाल, वंदना जावरकर व महिला वनपाल, वनरक्षक यांनी केली. पोलिसांनी ती फेटाळली. प्रचंड बंदोबस्तात शिवकुमारला न्यायालयात हजर करण्यात आले.
दीपालीवर अंत्यसंस्कार
दीपाली चव्हाण यांच्यावर शुक्रवारी उशिरा रात्री नांदगाव खंडेश्वर तालुक्यातल्या मोरगाव लोणी येथे अंत्यसंस्कार करण्यात आले. दीपालीचे पती राजेश मोहिते यांचे मुळ गाव आहे. तिची आई, नातेवाईक व गावकरी, वन विभाग अधिकार्‍यांच्या उपस्थितीत दीपालीवर शोकाकुल वातावरणात अंत्यसंस्कार करण्यात आले. यावेळी सुद्धा अनेकांनी दीपालीला आत्महत्येस प्रवृत्त करणार्‍यांवर कठोर कारवाईची मागणी केली.
