गोंदिया, दि.7 : दरवर्षी प्रमाणे यावर्षी सुध्दा गोंदिया येथे 3 डिसेंबर हा आंतरराष्ट्रीय दिन मोठ्या उत्साहात साजरा करण्यात आला. त्याअनुषंगाने समाज कल्याण विभाग, जिल्हा परिषद गोंदिया व जिल्ह्यात कार्यरत दिव्यांगांच्या अनुदानित, विना अनुदानित, कायम विना अनुदानित शाळा/कार्यशाळा यांच्या संयुक्त विद्यमाने 3 डिसेंबर या आंतरराष्ट्रीय दिव्यांग दिनानिमीत्त विविध कार्यक्रमांचे आयोजन करण्यात आले होते.
2 डिसेंबर रोजी जिल्ह्यातील दिव्यांग शाळेतील विद्यार्थ्यांचे जिल्हास्तरीय क्रीडा स्पर्धेचे आयोजन पोलीस मुख्यालय कारंजा (गोंदिया) येथे करण्यात आले. याप्रसंगी कार्यक्रमाचे उद्घाटन जि.प. समाज कल्याण समिती सभापती पुजा सेठ यांनी केले तर कार्यक्रमाच्या अध्यक्षस्थानी जि.प.चे मुख्य कार्यकारी अधिकारी अनिल पाटील उपस्थित होते. दिव्यांगांच्या जिल्हास्तरीय क्रीडा स्पर्धेत जिल्ह्यातील 06 विशेष शाळांनी भाग घेतला. दिव्यांग विद्यार्थ्यांच्या विविध खेळ स्पर्धा आयोजित करण्यात आल्या. यामध्ये 50 मीटर धावणे, 100 मीटर धावणे, गोळा फेक, लांब उडी इत्यादी स्पर्धा घेण्यात आल्या. या दिवशी दिव्यांग विद्यार्थ्यांसह सर्व उपस्थितांसाठी सकाळी नाश्ता व दुपारी जेवणाची व्यवस्था करण्यात आली. यावेळी दिव्यांग विद्यार्थ्यांनी उत्स्फुर्तपणे सहभाग नोंदविला.
3 डिसेंबर रोजी सकाळी 8.30 वाजता इंदिरा गांधी स्टेडियम ते डॉ. बाबासाहेब आंबेडकर यांचे पुतळ्या पर्यंत दिव्यांग विद्यार्थ्यांची प्रभातफेरी (रॅली) काढण्यात आली. सदर रॅलीचे उद्घाटन जि.प. समाज कल्याण समिती सभापती पुजा सेठ यांनी केले व रॅलीला हिरवी झेंडी दाखवून रॅलीची सुरुवात करण्यात आली. त्यानंतर दिव्यांग विद्यार्थ्यांचे सांस्कृतिक कार्यक्रम व बक्षिस वितरण सोहळ्याचे आयोजन पोलीस मुख्यालय क्रीडांगण कारंजा (गोंदिया) येथे सकाळी 11 वाजेपासून करण्यात आले. सदर कार्यक्रमाचे उद्घाटन समाज कल्याण समितीचे सदस्य हनुवंत वटी यांनी केले. कार्यक्रमाच्या अध्यक्षस्थानी जि.प. समाज कल्याण समिती सभापती पुजा सेठ हया होत्या. तर विशेष अतिथी म्हणून समाज कल्याण समितीचे सदस्य किशोर महारवाडे, प्रिती कतलाम, छबु उके, पं.स. सदस्य किर्ती पटले, एनएमडी कॉलेजचे सहाय्यक प्राध्यापक शशिकांत चवरे, नॅब ॲक्टीव्हीटी सेंटरचे अध्यक्ष, पोलीस मुख्यालयाचे श्री. चकाटे उपस्थित होते.
जिल्हास्तरीय क्रीडा स्पर्धेत प्रथम व द्वितीय आलेल्या दिव्यांग विद्यार्थ्यांना मान्यवरांच्या हस्ते ट्रॉफी व प्रमाणपत्र वाटप करण्यात आले. तसेच सांस्कृतिक कार्यक्रमामध्ये भाग घेणाऱ्या दिव्यांग विद्यार्थ्यांना व क्रीडा स्पर्धेत तृतीय आलेल्या दिव्यांग विद्यार्थ्यांना सुध्दा मान्यवरांच्या हस्ते प्रोत्साहनपर बक्षिस वितरण करण्यात आले. यावेळी जि.प. समाज कल्याण समिती सभापती पुजा सेठ व जिल्हा समाज कल्याण अधिकारी शंकर वैद्य यांनी 3 डिसेंबर जागतिक दिव्यांग दिनानिमीत्त दिव्यांग बांधवांना त्यांच्या पुढील वाटचालीसाठी शुभेच्छा दिल्या. दिनांक 8 डिसेंबर 2023 रोजी जागतिक मतीमंद दिनानिमीत्त गोंदिया जिल्ह्यातील मतीमंद शाळांमध्ये मतीमंद मुलांच्या पालकांचा मेळावा आयोजित करण्यात येणार आहे असे सूचित करण्यात आले.
