गोंदिया,दि.०५ः-गोंदिया तालुक्यात गेल्या तीन चार दिवसात झालेल्या गारपीट, अवकाळी पावसामुळे व वादळी वाऱ्यांमुळे अनेक घरांचे, शेतांचे व पिकांचे मोठ्या प्रमाणात नुकसान झाल्याने आमदार विनोद अग्रवाल यांनी मतदारसंघातील नुकसानग्रस्त भागातील शेत व घऱांची पाहणी करीत स्वतः गावागावात जाऊन परिस्थितीचा आढावा घेतला आणि पीडित नागरिकांशी थेट संवाद साधला.त्यांनतर तालुका प्रशासकीय यंंत्रणेला या नैसर्गिक आपत्तीतून झालेल्या नुकसानीचे अचूक मूल्यांकन करण्यासाठी आमदारांनी तलाठी, ग्रामसेवक व कृषी सहाय्यक यांना त्वरित संयुक्त पंचनामे सुरू करण्याचे निर्देश दिले. त्यांनी शेतकऱ्यांशी प्रत्यक्ष संवाद साधून त्यांच्या अडचणी जाणून घेतल्या.
या दौऱ्यात आमदार अग्रवाल यांच्यासोबत उपविभागीय अधिकारी चंद्रभान खंडाईत, जिल्हा कृषी अधिकारी निलेश कानवडे, तहसीलदार गोंदिया ग्रामीण समशेर पठाण, गटविकास अधिकारी आनंद पिंगळे, गोंदिया पंचायत समितीचे सभापती मुनेश रहांगडाले, जिल्हा परिषद कृषी व पशुसंवर्धन सभापती दीपताई चंद्रिकापुरे, तालुका कृषी अधिकारी नेहा आढाव तसेच संबंधित गावांचे तलाठी, ग्रामसेवक, कृषी सहायक, सरपंच व ग्रामपंचायत सदस्य उपस्थित होते.
