गोंदिया,दि.5: 5 जून रोजी जागतिक पर्यावरण दिन साजरा करण्याच्या निमित्ताने विविध शासकीय विभाग, सामाजिक संस्था आणि उत्साही स्वयंसेवक यांच्या संयुक्त सहकार्याने एक विशेष जनजागृती कार्यक्रम आयोजित करण्यात आला. या उपक्रमात सशक्त नारी ग्रुप, यूथ भारती फाउंडेशन, जलसंपदा विभाग, नगर परिषद, मृद व जलसंधारण विभाग आणि प्रादेशिक परिवहन कार्यालय (RTO) यांचा सक्रिय सहभाग होता, तसेच स्थानिक नागरिक व विद्यार्थ्यांनीही मोलाचा सहभाग नोंदवला. नगर परिषद व मृद व जलसंधारण विभागाने या उपक्रमास त्यांच्या सुरू असलेल्या वृक्षारोपण मोहिमेशी संलग्न केले.
गोंदिया शहरातील बाजपेई चौक ते सुभाष गार्डन या मार्गावर राबवलेल्या या मोहिमेत प्लास्टिक कचरा संकलन, स्वच्छता व पर्यावरण विषयक जनजागृती करण्यात आली. नागरिक व विद्यार्थी यांनी यामध्ये उत्साहाने सहभाग घेतला, स्वयंप्रेरणेने प्लास्टिक कचरा उचलला आणि परिसर स्वच्छ ठेवण्याची व प्लास्टिकचा वापर कमी करण्याची शपथ घेतली.हा उपक्रम शिखा पिपलेवार, वर्ग 1 अधिकारी, IPI उपविभाग, जलसंपदा विभाग, महाराष्ट्र शासन यांच्या नेतृत्वाखाली राबविण्यात आला.
सदर उपक्रमास शिखा पिपलेवार, अभियंता डॉ.सुरेश पिपलेवार, डॉ.तिलकचंद धुवारे, चंदू वैद्य (जलसंपदा विभाग), इंटीरियर डिझायनर सिंधू पिपलेवार (सशक्त नारी ग्रुप), सतीश डाखणे (समाजसेवक), शोभा धुवारे, सुनीता डोहारे, रेखा नाईक, गीता शिरसाठे (सशक्त नारी ग्रुप), ॲड. तेजस रूपारेल, बँकर आशा चौरागडे (यूथ भारती सचिव),अनुराग बर्डे (यूथ भारती सचिव),निलीमा बासने (समाजसेविका), कल्पना,साक्षी रोकडे,आर्या लिल्हारे, उडान लिल्हारे उपस्थित होते.
या उपक्रमात सर्व विभाग व संस्थांनी सक्रिय सहभाग नोंदवला. सुमारे 50 पोत्यांहून अधिक प्लास्टिक कचरा गोळा करून पुनर्वापरासाठी पाठवण्यात आला. या प्रसंगी मान्यवरांनी प्लास्टिक प्रदूषणाविरुद्ध लढण्यासाठी वैयक्तिक जबाबदारीचे महत्त्व अधोरेखित केले व नैसर्गिक संसाधनांचे जतन करणे ही भविष्यातील पिढ्यांसाठी अत्यावश्यक बाब असल्याचे सांगितले.सर्व सहभागी सदस्यांनी आवश्यक त्या सूचना दिल्या — कचरा योग्य पद्धतीने टाकावा, सार्वजनिक ठिकाणी ठेवलेल्या कचरापेट्यांचा वापर करावा असे यावेळी सांगण्यात आले.
यावेळी सर्वांनी एकत्र येऊन “आपले घर,आपला परिसर,आपले शहर,आपले राज्य आणि आपला देश स्वच्छ ठेवूया!” असा संदेश दिला. या उपक्रमाला स्थानिक नागरिकांकडून भरभरून प्रतिसाद मिळाला.
