खासदार प्रफुल पटेलांचे पोस्टल मतदान
पुर्णा पटेल व प्रज्वल पटेलांची मतदानास दांडी
रामनगर परिसरात तणाव,बीएचजे मतदान केंद्रानजीक अपक्ष उमेदवाराची दगडफेक
गोंदिया,दि.09- गोंदिया व तिरोडा नगर परिषदेच्या सार्वत्रिक निवडणूकीसाठी आज ८ जानेवारी रोजी सकाळी ७.३० वाजता मतदानाला सुरवात झाली.सकाळपासूनच मतदानासाठी मतदारामध्ये अनुत्साह दिसून आला.तर गोंदिया शहरातील रामनगर,सिंधी काॅलनी भागासह छोटा गोंदियातील काही मतदान केंद्रावर तणावाची स्थीती बघावयास मिळाली.बीएचजे मतंदान केंद्रानजीक एका अपक्ष उमेदवारांने दुसर्या अपक्ष उमेदवारावर दगडफेक केल्याने काही काळ तणावाचे वातावरण निर्माण झाले होते.सरासरी दुपारपर्यंत मतदान हे संथगतीने होत असल्याचे दिसून आले.गोंदिया शहरात दुपारी दीड वाजेपर्यंत 27.79 टक्के मतदान तर तिरोडा येथे 29.80 टक्के मतदान झाले होते.गोंदिया व तिरोडा न.प.सार्वत्रिक निवडणूक दुपारी 3:30 वाजतापर्यंत गोंदिया-44.65%
तिरोडा-47.68% मतदान झाले आहे.मतदान टक्केवारी माहिती उपलब्ध करुन देण्यात प्रशासन मात्र अपयशी ठरत असल्याचे दिसून येत आहे.
आज मतदानाला सुरवात झाल्यानंतर नगराध्यक्षपदासाठी रिंगणात असलेल्या सर्वच उमेदवारांनी आपल्या मतदानकेंद्रावर आधी मतदान केले.भाजपचे नगराध्यक्ष पदाचे उमेदवार अशोक इंगळे यांनी विवेक मंदीर शाळेतील मतदान केंद्रावर मतदानाचा हक्क बजावला.राष्ट्रवादी काँग्रेसच्या महिला नेत्या वर्षा पटेल यांनी नमाद महाविद्यालयाच्या मतदान केंद्रावर,माजी आमदार राजेंद्र जैन यांनी सपत्नीक नगरपरिषदेच्या आवारात असलेल्या मतदान केंद्रावर मतदानाचा हक्क बजावला.मात्र राष्ट्रवादी काँग्रेसचे नेते खासदार प्रफुल पटेल यांनी मतदानाचा हक्क न बजावता त्यांनी पोस्टल मतदान केल्याची माहिती त्यांच्या कार्यालयीन सुत्रांनी दिली.तर त्यांची सुपुत्री युवती नेतृत्व पुर्णा पटेल,प्रज्वल पटेल हे मात्र मतदानासाठी गोंदियात आले नसल्याने त्यांनी मतदान टाळले.