चंद्रपूर,दि.24ः- कोरपना तालुक्यातील गड़चांदुर येथील माणिकगड सिमेंट व पॉवर प्लांटच्या वायुप्रदूषणामुळे गडचांदुर व परिसरातील नागरिकांचे आरोग्य धोक्यात आल्याने राजुरा विधानसभा मतदारसंघाचे आमदार संजय धोटे यांनी पावसाळी अधिवेशनात तारांकित प्रश्न उपस्थित करुन सरकारचे लक्ष वेधण्याची तयारी केली आहे. मणिकगड सिमेंट कंपनीद्वारे होणारे हवा, वायु, जल, केमिकल मिश्रित धुळ यासबंधी प्रश्न उपस्थित केले जाणार आहे.
मणिकगड सिमेंट कंपनीच्या प्रदुषणामुळे गड़चांदुर व परिसरातील जनआरोग्यचा प्रश्न निर्माण झाला त्यामुळे अनेक आजार जडले जात आहे. हे मानवी आरोग्य दृष्टीने अतिशय हानिकारक व शरीराला बाधा पोहचविणारे आहे. तसेच शेतकऱ्यांच्या शेतपिकांवरसुद्धा याप्रदूषणाचा परिणाम होत आहे. तसेच जिल्हाधिकारी व प्रदूषण नियंत्रण मंडळाने जनतेच्या आरोग्यावर विपरीत परिणाम होते किंवा कसे काय ? व यासर्व बाबींचा शेतमालावर काय परिणाम होत आहे याबाबत अहवाल सादर करण्याचे जिल्हा आरोग्य अधिकारी व जिल्हा कृषी अधिक्षक यांना आदेश दिले होते परंतू २ महिने उलटूनही याबाबतचा अहवाल सादर झाला नाही.
तसेच प्रदूषण नियंत्रण मंडळाने आमदार संजय धोटे यांना दिलेल्या अहवालात माणिकगड सिमेंट कंपनी यांनी प्रदूषण रोखण्याकरिता उभारलेली यंत्रना हि अपुरी असल्याचा अहवाल सादर केला होता.परंतु प्रदूषण नियंत्रण मंडळाने कंपनीवर पाहिजे त्याप्रकारे कार्यवाही केलेली नाही. त्यामुळे ही गंभीर बाब लक्षात घेऊन नागरिकांच्या आरोग्याच्या दृस्टिकोणातून हा प्रश्न आमदार धोटे यांनी उपस्थित करण्याचा मानस व्यक्त केला आहे. कंपनीच्या प्रदुषणाबाबत भारतीय जनता युवा मोर्चाचे जिल्हा सचिव आशिष ताजने यांनी निवेदन पालकमंत्री सुधीर मुनगंटीवार व आमदार संजय धोटे यांना निवेदन दिले आहे.
