गोंदिया,दि.25ः-गोंदिया जिल्ह्यात कोरोनाचा संसर्ग सातत्याने वाढत असून जिल्हा परिषदेच्या पंचायत विभागात कोरोनाचा शिरकाव झाल्याने पुढील खबरदारीचे उपाययोजना करण्यासाठी व इमारतीच्या निर्जतुंकीकरणासाठी येत्या सोमवारपर्यंत(31 आॅगस्ट)प्रशासकीय इमारतीमधील सर्व कार्यालये अत्यावश्यक सेवा वगळता बंद करण्याचे आदेश मुख्य कार्यकारी अधिकारी राजेश खेवले यांनी आज(दि.25) काढले आहेत.शासन निर्णयाप्रमाणे 15 टक्के कर्मचारी हे कार्यालयात कामावर असायला हवे होते,मात्र गोंदिया जिल्हा परिषदेतील सर्वच विभागातील हजेरी बघितल्यास ती 100 टक्के होती.त्यातच जिल्ह्यातील नागरिकांसह येणार्यांची संख्याही अधिक होती.त्यातच जिल्हा परिषद प्रशासकीय इमारतीमधील कर्मचारी पाॅझिटिव्ह आढळल्याने अधिकांना तो संसर्ग होऊ नये याकरीता जिल्हा परिषदेचे(आरोग्य सेवा व अत्यावश्यक सेवेतील कर्मचारी अधिकारी वगळून)इतर सर्व कार्यालय बंद करण्यात आले आहेत.सोबतच दरदिवशी कार्यालय निर्जतुंकीकरणासाठी एक कर्मचारी व परिचर नेमण्याचे आदेश मुकाअ यांनी दिले असून पाॅझिटिव्ह आलेल्या व्यक्तीच्या संपर्कात आलेल्या पंचायत व सामान्य प्रशासन विभागातील कर्मचारी यांची तपासणीही करण्यात येणार असल्याची माहिती मिळाली आहे. रुग्ण आढळल्यानंतर आज पहिल्यांदाच जिल्हा परिषदेतील इमारत व कार्यालये सॅनिटाईझ करण्यात आले.
