उत्तरप्रदेशात करोनाने भीषण स्थिती

यमुनेत अनेक मृतदेह आढळल्याने यंत्रणा हादरली

लखनौ,दि.8- उत्तर प्रदेशात करोनाने भीषण स्थिती निर्माण झाली आहे. ग्रामीण भागातही करोनाने थैमान घातले असून हमीरपूर जिल्ह्यातील हृदय पिळवटून टाकणारे फोटो समोर आले आहेत. गावकरी अंत्यसंस्कार करण्याऐवजी मृतदेह थेट यमुना नदीत प्रवाहित करत असल्याचे सांगण्यात येत आहे.

गावातील मुलांसमोर अनेक मृतदेह यमुनेत प्रवाहित करण्यात आले. गेल्या काही दिवसांपासून अनेक मृतदेह आणले जातात आणि यमुना नदीत सोडले जात आहेत, असे मुले सांगत आहेत. हमीरपूर जिल्ह्यातून वाहत असलेल्या यमुनेचा उत्तरेतील किनारा कानपूर जिल्ह्याला लागून आहे. हमीरपूर जिल्ह्यातील नागरिक यमुना नदीला मोक्षदायिनी कालिंदीचे रुप मानतात. यामुळे मृत्यू झाल्यानंतर मृतदेह अशाच प्रकारे नदीत प्रवाहित करण्याची जुनी परंपरा आहे. सामान्यपणे यमुनेत असेही एक दोन मृतदेह आढळून येतात. पण आता तर मृतदेहांचा पूरच आला. यामुळे यूपीच्या ग्रामीण भागात किती मोठ्या प्रमाणावर मृत्यू होत आहे, याचा अंदाज लावला जाऊ शकतो.

शेतांमध्येही आता अंत्यसंस्कार केले जात आहेत. या मृत्युंबाबत सरकारकडे कुठलीही माहिती नाही. या मृत्युंची नोंदही होत नाही. यामुळे गावांमधील स्थिती अतिशय बिकट होत चालली आहे.