वृत्तसंस्था/नवी दिल्ली–नागपूरच्या २0 वर्षीय मालविका बनसोडने गुरुवारी बॅडमिंटन विश्वात मोठ्या उलटफेराची नोंद केली आहे. लंडन ऑलिम्पिक कांस्यपदक विजेती भारताची पहिली फुलराणी सायना नेहवाल प्रदीर्घ कालावधीनंतर बॅडमिंटन कोर्टवर परतली होती, पण तिचा प्रवास लवकरच संपुष्टात आला. इंडियन ओपन बॅडमिंटन स्पर्धेत नागपूरच्या मालविका बनसोडने सायनाचा पराभव केला. महिला एकेरीच्या दुसर्या फेरीच्या या सामन्यात मालविकाने सायनाला २१-१७, २१-९ असा सलग सेटमध्ये पराभवाचा धक्का दिला. हा सामना फक्त ३४ मिनिटे चालला. सायना सध्या जागतिक क्रमवारीत २५ व्या क्रमांकावर, तर मालविका १११ व्या क्रमांकावर आहे.
सायनाचा वर्षातील पहिल्या बॅडमिंटन स्पर्धेतील प्रवास दुसर्या फेरीतच थांबला आहे. दुसरीकडे भारताची आणखी एक स्टार शटलर पी.व्ही. सिंधूनेही विजयासह पुढील फेरीत प्रवेश केला आहे. तिने इरा शर्माविरुद्धचा दुसर्या फेरीचा सामना २१-१0, २१-१0 असा जिंकला. तसेच अश्मिता चलिहा हिनेही दुसर्या फेरीचा सामना जिंकला आहे. आता तिसर्या फेरीत अश्मिताचा सामना सिंधूशी होणार आहे.
दरम्यान, पी.व्ही.सिंधूने सायनाला याआधी पराभूत केले होते. सिंधू ही पहिली तर मालविका ही दुसरी भारतीय खेळाडू ठरली आहे, ज्यांनी सायनाला महत्त्वाच्या बॅडमिंटन स्पर्धेत पराभूत केले आहे. सायनाला पहिल्या फेरीत झेक प्रजासत्ताकची तेरेझा स्वाबिकोवा हिला दुखापत झाल्यामुळे थेट दुसर्या फेरीत प्रवेश मिळाला होता.
पहिल्या गेमच्या सुरुवातीला सायना आणि मालविका यांच्यात बरोबरी होती. एकवेळ दोन्ही खेळाडू ४-४ असे बरोबरीत होत्या. त्यानंतर मालविकाने आघाडी घेतली आणि ती शेवटपयर्ंत कायम राखली. दुसर्या गेममध्येही दोघेही २-२ अशा बरोबरीत होत्या. त्यानंतर मालविकाने आपला वेग वाढवला आणि सामना जिंकेपयर्ंत तिने मागे वळून पाहिले नाही.
मालविका ही महाराष्ट्रातील एक प्रतिभावान बॅडमिंटन खेळाडू आहे. तिने १३ वर्षांखालील आणि १७ वर्षांखालील स्तरावर राज्यस्तरीय स्पर्धा जिंकल्या आहेत. २0१८ मध्ये, तिची जागतिक ज्युनियर बॅडमिंटन स्पर्धेसाठी भारतीय संघात निवड झाली होती. २0१८ मध्ये तिने काठमांडू येथील दक्षिण आशियाई बॅडमिंटन स्पर्धेचे जेतेपद पटकावले होते. २0१९ मध्ये तिने ऑल इंडिया सीनियर रँकिंग टूर्नामेंट जिंकली. तसेच २0१९ मध्येच मालविकाने मालदीव इंटरनॅशनल फ्युचर सीरीज स्पर्धेचे विजेतेपदही पटकावले होते.
मी आता कुठे उभी आहे हे पाहण्यासाठी आले
गुडघा आणि मांडीच्या दुखापतीतून सावरल्यानंतर सायना नेहवाल तिची पहिली स्पर्धा खेळत होती. पराभव पत्करावा लागल्यानंतर ती म्हणाली, गेल्या वर्षी ऑक्टोबरमध्ये मी जखमी झाले. २७ डिसेंबरपासून मी पुन्हा खेळायला सुरुवात केली आहे. मी आता कुठे उभी आहे आणि अजून किती सुधारणा आवश्यक आहेत, हे पाहण्यासाठी मी या स्पर्धेत आले होते.
मी दोन सामने खेळू शकले, याचा मला आनंद आहे, पण हे मान्य करावेच लागेल की, खराब फिटनेसशिवाय मालविका, अकाशी आणि सिंधूसारख्या खेळाडूंविरुद्ध खेळणे फार कठीण आहे. मालविकाबाबत सायना म्हणाली की, ती चांगली खेळत आहे आणि तिच्या खेळात सातत्याने सुधारणा होत आहेत. ती रॅली खेळण्यात उत्कृष्ट आहे. मालविका या स्पर्धेतही चांगली कामगिरी करेल, अशी आशा आहे.
