मूल- सामाजिक बांधिलकी जोपासत येथील तहसीलदारांनी मातापित्याच्या नांवाने सुवर्ण पदक पुरस्कार देण्यासाठी गोंडवाना विद्यापीला तीन लाखांचा निधी देऊन उच्च शिक्षण घेणार्‍या विद्यार्थ्यांचा उत्साह वाढविला आहे.
दिवंगत आई-वडिलांच्या इच्छेखातर मूल येथील तहसीलदार डॉ. रवींद्र होळी यांनी उच्च शिक्षण घेणार्‍या विद्यार्थ्यांमध्ये स्पर्धा निर्माण होऊन समाजाचे नाव मोठे व्हावे. हा दृष्टिकोन समोर ठेवून शैक्षणिक सत्र २0२१-२२ पासून गोंडवाना विद्यापीठाच्या बी. एस्सी.च्या अंतीम वर्षात अनुसूचित जमाती प्रवर्गातील गुणानुक्रमे प्रथम आलेल्या विद्यार्थिनीला दिवंगत मंजुळाबाई साधुजी होळी यांच्या नावाने सुवर्ण पदकासाठी १ लाख ५0 हजार रुपये तर साधुजी पाटील होळी यांच्या नावानी बी. एस्सी. विज्ञान आणि मानवतावादी विषयात प्रथम आलेल्या विद्यार्थी किंवा विद्यार्थिनीला सुवर्ण पदक देण्यासाठी १ लाख ५0 हजार, असा एकूण ३ लाख रुपयांचा धनादेश गोंडवाना विद्यापीठ गडचिरोलीचे कुलगुरू डॉ. प्रशांत बोकारे यांना स्वाधीन केला.
दिवंगत साधुजी पाटील होळी यांचे इयत्ता चौथीपर्यंत शिक्षण झाले. मात्र, आर्थिक अडचणीमुळे त्यांना पुढील शिक्षण घेता आले नाही. परंतु, कुटुंबातील प्रत्येकाने उच्च शिक्षण घेतले पाहिजे. यासाठी त्यांची धडपड सदैव होती. त्यांच्याच धडपडीचा वारसा जोपासत तहसीलदार डॉ. रवींद्र होळी यांनी शिक्षणात हुशार असलेल्या समाजातील विद्यार्थ्यांचा उत्साह वाढविण्याचे उद्देशाने वडील साधुजी पाटील होळी आणि आई मंजुळाबाई साधुजी होळी यांच्या नावाने सुवर्ण पदक प्रदान करण्याचा निर्धार केला असून, त्यांनी गडचिरोलीच्या गोंडवाना विद्यापीठाचे कुलगुरू डॉ. प्रशांत बोकारे यांच्याकडे ३ लाखांचा धनादेश सुपुर्द केला.
यावेळी विद्यापीठाचे प्र-कुलगुरू डॉ. कावळे, त्यांचे आमदार असलेले काका डॉ. देवराव होळी, विद्यापीठाचे डॉ. नरेश मडावी आणि चलाख उपस्थित होते. सुवर्ण पदकाच्या राशीशिवाय आर्थिक अडचणीमुळे उच्च शिक्षणापासून वंचित राहणार्‍या अनुसूचित जमातीच्या पाच विद्यार्थ्यांना सहकार्य करण्याचा मनोदय डॉ. रवींद्र होळी यांनी यावेळी व्यक्त केल्याने विद्यापीठाच्यावतीने कुलगुरू डॉ. बोकारे यांनी तहसीलदार डॉ. होळी यांच्याप्रती आभार व्यक्त केले.
