मुंबई,दि.28ः भाजपचे नेते नितेश राणे आणि शिवसेनेच्या उपनेत्या सुषमा अंधारे यांच्यातील वाद विकोपाला जाताना दिसून येत आहे. नितेश राणेंनी सुषमा अंधारेंचा बाळासाहेब ठाकरे यांच्यावर टीका केल्याचा व्हिडिओ पोस्ट करत त्यांच्यावर निशाणा साधला आहे. यानंतर सुषमा अंधारे चांगल्याच संतापल्या आहेत. अंधारेंनी फेसबुकवर फडणवीसांनी नारायण राणेंवर केलेल्या टीकेचा व्हिडिओ पोस्ट केला असून तुझ्या वडिलांचे वस्त्रहरण करणाऱ्या देवेंद्रजींना नेता कसे मानले? असा सवाल नितेश राणेंना केला आहे.
सुषमा अंधारेंची फेसबुक पोस्ट जशीच्या तशी
प्रिय नीतू
तुझा अभ्यास फारच कच्चा आहे . तुला अजून होमवर्कची गरज आहे. तब्बल वीस वर्षांपूर्वीचा महाविद्यालयीन वाद विवाद स्पर्धेतला व्हिडिओ शेअर करताना किमान चेहरा पट्टीतील बदल तरी तू लक्षात घ्यायला हवा होतास.
पण पण असू दे बाळा. मुळात माझ्या भावाने तुझ्या अभ्यासाकडे व्यवस्थित लक्ष दिले असते तर तू आता अशा अर्ध्या कच्च्या संकल्पना घेऊन बोलत राहिला नसतास. स्वातंत्र्यवीर सावरकरांबद्दल सह 2015 सालचे तुझे ट्विट ही जर तुझी आज चूक असेल तर ते तू अजूनही डिलीट का केले नाहीस किंवा गाणं सम्राज्ञी लता मंगेशकरजी या मोदीजींच्या स्टेजवर गेल्या म्हणून तू त्यांचा भारतरत्न परत मागितला या तुझ्या बालिश वक्तव्यांवर मी अजिबात बोलणार नाही.
मी तुला अस्सल व्हिडिओ तुझ्या आजमितीला असणाऱ्या प्राणप्रिय नेत्याचा तुला पाठवत आहे . भर सभागृहात आपल्याच सख्ख्या वडिलांचे म्हणजेच माझ्या भावाचे वस्त्रहरण करणाऱ्या देवेंद्रजींना तू नेता कसे काय स्वीकारले असेल बरे? हा व्हिडिओ ऐकल्यावर जर तुला काही शंका उपस्थित होणार असतील तर मला पुन्हा एकदा अभ्यास घ्यायला आवडेलच.
तुझी आत्या
अशी फेसबूक पोस्ट करत सुषमा अंधारेंनी नितेश राणेंवर हल्लाबोल केला आहे.
काय होते नितेश राणेंचे टविट?
हिंदुहृदयस्रमाट बाळासाहेब ठाकरेंची थिल्लरपणे टवाळी करणाऱ्यांच्याच हातात शिवबंधन? अरे किती ती सत्तेसाठी लाचारी! सांगा कुणी केली बाळासाहेबांसोबत गद्दारी? असे ट्विट करत नितेश राणे यांनी सुषमा अंधारे आणि शिवसेनेवर निशाणा साधला होता.
