पवनी- तालुक्यात वाघाने आणखी एक बळी गेला घेतला असून एकाच आठवड्यातील ही दुसरी घटना आहे. मृतकाचे नाव ईश्वर सोमा मोटघरे , वय ५८, रा. खातखेडा असे आहे. दरम्यान, आठवडाभरात वाघाच्या हल्ल्याच्या दोन घटनांमुळे संतप्त झालेल्या गावकऱ्यांनी वनाधिकाऱ्यांवर हल्ला केला. यात सहायक वनसंरक्षक यशवंत नागुलवार, वनपाल वावरे आणि गुप्ता गंभीर जखमी झाले.
यापूर्वी २३ जून रोजी पवनी तालुक्यातील गुडेगाव येथे याच वाघाने पहिला बळी घेतला होता. या घटनेमुळे गावकऱ्यांमध्ये रोष होता. अशातच, त्याच वाघाने खातखेडा एसटी बसस्थानकावर आणखी एका गावकऱ्याचा बळी घेतला. यामुळे गावकऱ्यांचा संताप अनावर झाला.घटनास्थळी दाखल झालेल्या सहायक वनसंरक्षक नागुलवार, वनपाल वावरे आणि गुप्ता यांना ग्रामस्थांच्या रोषाला सामोले जावे लागले. ग्रामस्थांनी त्यांच्यावर हल्ला केला. यात तिन्ही अधिकारी गंभीर जखमी झाले. त्यांच्यावर स्थानिक रुग्णालयात प्रथमोपचार केल्यानंतर नागपुरातील खासगी इस्पितळात हलवण्यात आले
