पुणे,दि.27ः- मराठा आरक्षणासाठी मुख्यमंत्र्यांनी स्थापलेल्या शिंदे समितीचे काम आता संपले आहे. त्यामुळे या समितीचा अहवाल आम्ही मान्य करणार नाही, अशी आक्रमक भूमिका कॅबिनेट मंत्री छगन भुजबळ यांनी मांडली आहे. मुख्यमंत्र्यांनी शिंदे समिती स्थापन केली तेव्हा त्यास आमचा विरोध नव्हता. कारण त्यांच्याकडे केवळ मराठवाड्यातील निजाम शाहीतील कुणबी नोंदी पडताळणी काम होते. मात्र, आता राज्यभरात जिल्हाजिल्ह्यात कुणबी नोंदी तपासल्या जात आहे. त्यास आमचा विरोध आहे, असे छगन भुजबळ म्हणाले. ते पुण्यात पत्रकारांशी संवाद साधत होते.
शिंदे समितीला राज्यभर पुरावे पडताळण्याची संमती नव्हती
कुणबी प्रमाणपत्र मिळाल्यास त्याला आपोआप ओबीसी आरक्षण मिळते. कुणबी नोंद असल्यास प्रमाणपत्र देण्यास हरकत नाही, पण सरसकट मराठ्यांना प्रमाणपत्र देण्यास विरोध असल्याचे भुजबळ म्हणाले. भुजबळ पुढे म्हणाले की, मुख्यमंत्री एकनाथ शिंदे यांनी समिती नेमली त्याला हरकत नाही. शिंदे समितीला राज्यभर पुरावे पडताळण्याची संमती नव्हती. सर्वच प्रमाणपत्रावर कुणबी लिहिले जात आहे. आपला मराठा आरक्षणाला विरोध नसून झुंडशाहीला विरोध असल्याचे ते म्हणाले. ते पुढे म्हणाले की, भुजबळ यांनी एक दगड मारला का? एक टायर जाळला का? हे म्हणतात आमच्या लोकांवर गुन्हे दाखल करू नका, बीड कुणी जाळले हे बघा ना. मी जबाबदारीने वक्तव्य केली आहेत. इतरांना समाजाबद्दल बोलण्याचा अधिकार आहे तेवढाच भुजबळला सुद्धा बोलण्याचा अधिकार असल्याचे भुजबळ म्हणाले.
सरसकट मराठा आरक्षण मान्य नाही
भुजबळ पुढे म्हणाले की, मराठवाड्यातील कुणबी असून प्रमाणपत्र मिळत नाही हा मूळ मुद्दा होता. याचा तपास व्हावा यासाठी न्यायमूर्ती शिंदे समिती स्थापन झाली. संपूर्ण महाराष्ट्रात जाऊन जिल्ह्या जिल्ह्यात जाऊन करा असे सांगितले नव्हते. त्यामुळे त्यांचे काम संपले आहे. सरसकट मराठा आरक्षण द्या ही मागणी आम्ही मान्य करू शकत नाही. मराठवाड्यातील वंशावळ चेक करून कुणबी प्रमाणपत्र मिळाले तर ते ओबीसीमध्ये येतात, असेही त्यांनी सांगितले.
मी कुठल्याही समाजाचा प्रचार करत नाही
यावेळी बोलताना भुजबळ कुठल्याही समाजाचा प्रचार करत नसल्याचे म्हणाले. ते म्हणाले की, मी कोणत्याही समाजाच्या विरोधात नाही. मी ओबीसी समाजाची बाजू मांडतो. मनोज जरांगे एबीपी माझावर म्हणतात, भुजबळ यांच्या पाहुण्यांनी बीड जाळले. मराठा समाजाला विरोध नाही, आरक्षण द्यायला विरोध नाही. पोलीस महिला हॉस्पिटलमध्ये आहेत. पोलिसांना पाठिंबा देण्याची गरज आहे.बीडमध्ये नेमके काय झाले याबाबत होम मिनिस्टर यांनी माहिती द्यावी असेही भुजबळ म्हणाले.
