विविध अभ्यासक्रमांसाठी १ लाख २५ हजार ३२१ अर्ज
१९ हजार ०६ विद्यार्थ्यांची नोंदणी
मुंबई, दि.२५ मुंबई विद्यापीठातील विविध पदव्युत्तर शैक्षणिक विभागातील आणि संलग्नित महाविद्यालयातील पदव्युत्तर अभ्यासक्रमांच्या प्रवेशाची पहिली गुणवत्ता यादी आज (बुधवार) जाहीर केली जाणार आहे. विद्यार्थ्यांनी ज्या- ज्या शैक्षणिक विभागात आणि महाविद्यालयात पदव्युत्तर अभ्यासक्रमांसाठी अर्ज केले आहेत त्या-त्या ठिकाणी गुणवत्ता यादी पाहायला मिळणार आहे. मुंबई विद्यापीठामार्फत राबविण्यात आलेल्या पदव्युत्तर अभ्यासक्रमांच्या या प्रवेश प्रक्रियेला विद्यार्थ्यांचा उत्स्फूर्त प्रतिसाद मिळाला. १९ हजार ६ विद्यार्थ्यांनी विविध अभ्यासक्रमांसाठी १ लाख २५ हजार ३२१ एवढे अर्ज सादर केले आहेत. यामध्ये विविध सलंग्नित महाविद्यालये आणि विद्यापीठातील पदव्युत्तर शैक्षणिक विभागांचा समावेश आहे.
यामध्ये एमकॉम (एडव्हान्स अकाऊंटसी) या अभ्यासक्रमासाठी सर्वाधिक २६,२१७ एवढे अर्ज प्राप्त झाले असून, एमए (सायकोलॉजी) या अभ्यासक्रमासाठी ९,७१९ एवढे अर्ज प्राप्त झाले आहेत. तर एमएस्सी (बायोटेक) साठी ८,१३५, एमएस्सी (मायक्रोबायोलॉजी) साठी ५,३४३, एमएस्सी (इन्फॉर्मेशन टेक्नोलॉजी) ७,३१५, एमकॉम (बिझनेस मॅनेजमेंट) ७,९०३, बँकिंग अँड फायनान्स ६,३५९, एमएस्सी (ऑर्गेनिक केमिस्ट्री) ६,९६३, एमएस्सी (कम्प्युटर सायन्स) ५,१९९, एनॅलिटीकल सायन्स ५,०४८, डेटा सान्यन्स २,२१८, एमए (इंग्रजी) २,२९०, एमए (इकोनॉमिक्स) ३,२७५, एमएस्सी (झुलॉजी) २,८२७, एमए (हिस्ट्री) १,७९६, एमएस्सी (फिजिक्स) १,५७७, एमएस्सी (बॉटनी) १,६९८ यासह विविध अभ्यासक्रमांना विद्यार्थ्यांनी अर्ज सादर केलेत. हे अर्ज विद्यापीठातील शैक्षणिक विभाग आणि संलग्नित महाविद्यालयांतील पदव्युत्तर अभ्यासक्रमांसाठी आहेत.
मुंबई विद्यापीठाच्या पदव्युत्तर शैक्षणिक विभागास प्राप्त झालेले अर्जः
मुंबई विद्यापीठाच्या पदव्युत्तर शैक्षणिक विभागात सर्वाधिक ८४८ अर्ज हे सायकॉलॉजी विभागास प्राप्त झाले असून कॉमर्स विभागास ६७९ एवढे अर्ज प्राप्त झाले आहेत. तर केमिस्ट्री ६२४, आयटी ५५४, कम्प्युटर सायन्स ४२८, बायोटेक ४१९, कम्युनिकेशन अँड जर्नेलिझम ३४७, सिविक्स अँड पॉलिटिक्स २९३, लाईफ सायन्स २८३, स्टॅटेस्टिक्स २१९, इंग्रजी १९१, पाली १५२, मॅथेमॅटिक्स १४१, हिस्ट्री १३७, जिओग्राफी १३०, फिजिक्स १२९, सोशिओलॉजी १०४, संस्कृत ९१, फिलॉसॉफी ६२ अशा विद्यापीठातील विविध पदव्युत्तर विभागात विद्यार्थ्यांनी अर्ज सादर केले आहेत.
मुंबई विद्यापीठाशी सलंग्नित सर्व महाविद्यालये, स्वायत्त महाविद्यालये आणि मान्यताप्राप्त शिक्षणसंस्थामध्ये शैक्षणिक वर्ष २०२४-२०२५ साठीच्या पदव्युत्तर अभ्यासक्रमांच्या प्रवेश प्रक्रियेच्या ऑनलाईन नाव नोंदणी आणि अर्ज सादर करण्यास २२ मे २०२४ पासून सुरुवात करण्यात आली होती. विद्यापीठाच्या प्रचलित नियमानुसार व नियोजित वेळापत्रकानुसार आज (बुधवार) संध्याकाळी ६ वाजता गुणवत्ता यादी ही त्या- त्या महाविद्यालयामार्फत व विद्यापीठातील पदव्युत्तर शैक्षणिक विभागाद्वारे जाहीर केली जाणार असल्याचे परीक्षा व मूल्यमापन मंडळाच्या संचालिका डॉ. पूजा रौंदळे यांनी सांगितले.
