बीड,दि.30 : यंदाही भगवान गडावर दसरा मेळावा होणार नाही किंवा भगवानगडाच्या पायथ्याशीही होणार नाही. तर यंदाचा दसरा मेळावा भगवानगडापासून 50 किलोमीटर अंतरावर असणाऱ्या सावरगाव घाटमध्ये पार पडणार आहे.भगवानगडावरील दसरा मेळाव्याची परंपरा खंडित करुन राज्याच्या ग्रामविकास मंत्री पंकजा मुंडे यांनी दसरा मेळाव्याची नवी परंपरा सुरुवात केली आहे. यंदाचा दसरा मेळावा भगवानबाबांची जन्मभूमी सावरगाव घाट इथे होणार आहे.सावरगाव घाट हे बीड जिल्ह्यातील पाटोदा तालुक्यात आहे. गावकऱ्यांनी दसरा मेळाव्यासाठी निमंत्रण दिल्यानंतर आता गडाऐवजी भगवान बाबांच्या जन्मभूमीतच दसरा मेळावा घेण्यावर शिक्कामोर्तब करण्यात आले. ग्रामविकासमंत्री पंकजा मुंडे यांच्या नेतृत्वाखालील दसरा मेळावा भगवानगडावर घेण्यास पाथर्डी तालुका प्रशासनाने गुरुवारी परवानगी नाकारली असल्याने संत भगवानबाबा यांचे जन्मगाव असलेल्या सावरगाव घाट येथे दसरा मेळावा होत आहे. सावरगाव येथे २५ एकरांत या मेळाव्याची तयारी सुरू आहे. दसरा मेळाव्यासाठी येणाऱ्या भाविकांसाठी पाणी, नाष्टा, चहा-फराळाची व्यवस्था ग्रामस्थांच्या वतीने करण्यात आली आहे. त्याचबरोबर काही शेतकऱ्यांनी आपली पिके काढून पार्किंगची व्यवस्था करून दिली आहे. १२ एकरांत जवळपास पाच लाख लोक बसतील अशी तयारी करण्यात आली आहे.या ठिकाणी एक मोठे व्यासपीठही उभारण्यात येत आहे. शुक्रवारी दुपारी आष्टी येथील पाथर्डीचे माजी आमदार दगडू पाटील, भाजपचे आमदार भीमराव धोंडे, माजी आमदार साहेबराव दरेकर, विजय गोल्हार, रमेश पोकळे यांनी मेळाव्याच्या तयारीची पाहणी केली आहे.
परळी तालुक्यातील पांगरी येथील गोपीनाथ गडावर लोकनेते गोपीनाथ मुंडे यांच्या समाधीचे दर्शन घेऊन भाजपच्या खासदार डॉ. प्रीतम मुंडे यांच्या नेतृत्वाखाली शनिवारी सकाळी सात वाजता चारचाकी वाहनांची रॅली सावरगाव घाटकडे निघणार आहे. सिरसाळा, तेलगाव, वडवणी, वंजरावाडी, पिठ्ठीनायगाव, तांबाराजुरी, वांजराफाटा, कुसळंबमार्गे, सावरगाव घाट येथे सकाळी अकरा वाजता ही रॅली पोहोचणार आहे.ग्रामविकासमंत्री पंकजा मुंडे पुणे येथून सकाळी पावणेअकरा वाजता हेलिकॉप्टरने निघणार असून पाटोदा तालुक्यातील सुपे सावरगाव घाट येथील हेलिपॅडवर दुपारी साडेबारा वाजता पोहोचणार आहेत.
