लाखनी : नायलान मांजावर बंदी असली तरी आजही पतंग उडविण्यासाठी मांजाचा सर्रास वापर सुरू असल्याचे अनेक घटनांवरून समोर येत आहे. अशीच एक घटना लाखनी तालुक्यातील सावरी /मुरमाडी येथील सोमलवाडा रोडवर घडली. लाखनीला जाणाऱ्या एका दुचाकीस्वार तरुणाचा गळा धारदार मांजाने कापला गेला. यात हा तरुण गंभीर जखमी झाला.सोमलवाडा व परिसरातील लोक विविध कामांसाठी लाखनीला ये-जा करतात. अशातच सोमलवाडा येथील एक युवक आपल्या कुटुंबीयासोबत काल २९ डिसेंबर रोजी सायंकाळी चार वाजताच्या सुमारास दुचाकीने लाखनी येथून सोमलवाडाकडे जात असताना सावरी येथील शक्ती राईस मिलजवळ धारदार मांजाने त्याच्या गळ्याला विळखा घातला. यात या युवकाचा गळा चिरला गेला. दुचाकीचा वेग कमी असल्यामुळे मोठा अनर्थ टळला.
