गडचिरोली,दि.२० : भामरागड तालुक्यातील अतिदुर्गम बिनागुंडा येथे घातपात घडवण्याच्या तयारीत असलेल्या ५ जहाल नक्षलवाद्यांना अटक करण्यात पोलिसांना यश आले. यात एका विभागीय समितीच्या महिला सदस्याचा समावेश आहे. या सर्वांवर महाराष्ट्र शासनाचे एकूण ३६ लाखांचे बक्षीस होते. उंगी मंगरु होयाम ऊर्फ सुमली (२८, छत्तीसगड), पल्लवी केसा मिडीयम ऊर्फ बंडी(१९, छत्तीसगड), देवे कोसा पोडीयाम ऊर्फ सबिता (१९, छत्तीसगड) अशी अटक केलेल्या नक्षलवाद्यांची नावे असून उर्वरित दोघांच्या वयाबाबत शंका असल्याने त्यांची नावे जाहीर करण्यात आली नाही.गडचिरोली पोलीस दलाच्या प्रभावी कारवाईमुळे जानेवारी 2022 ते आतापर्यंत एकुण 103 माओवाद्यांना अटक करण्यात गडचिरोली पोलीस दलास यश आले आहे.
नक्षलवाद्यांचा ‘टीसीओसी’ कालावधी सुरु असल्याने यादरम्यान ते घातपात घडवून आणतात. नक्षलवाद्यांचे गड समजले जाणाऱ्या अबुझमाड परिसरात येत असलेल्या भामरागड तालुक्यातील बिनागुंडा या अतिसंवेदनशील गावात ५० ते ६० च्या संख्येने नक्षलवादी एकत्र आले होते. पोलीस अधीक्षक नीलोत्पल याना ही गोपनीय माहिती मिळताच त्यांनी पोलीस उपअधीक्षक (अभियान) विशाल नागरगोजे यांच्या नेतृत्वात सी-६० चे ८ पथक आणि सीआरपीएफ तुकडीला अभियानासाठी १८ मे रोजी रवाना केले. १९ मे रोजी सकाळी सि-60 पथके माओवादविरोधी अभियान राबवित असताना बिनागुंडा गावाला शिताफीने घेराबंदी करुन गावामध्ये शोध घेण्यास सुरुवात केली असता, काही हिरवे-काळे गणवेश परिधान केलेले व काही साध्या वेशातील हत्यारासह असलेले संशयीत व्यक्ती पोलीस पथकावर घातपात करण्याची योजना आखत असल्याचे दिसून आले. गावामध्ये सामान्य नागरिक देखील असल्याने पोलीस पथकाने गोळीबार न करता अंत्यंत शिताफीने पाच माओवाद्यांना त्यांच्याकडील हत्यारासह ताब्यात घेतले. यावेळी इतर माओवादी गावाचा व जंगल परिसराचा फायदा घेत त्या ठिकाणावरुन पळून जाण्यास यशस्वी झाले.
त्यानंतर ताब्यात घेण्यात आलेल्या माओवाद्यांची अधिक सखोल चौकशी करण्यासाठी पोलीस मुख्यालय गडचिरोली येथे आणले असता, सदर इसमांची नावे 1) उंगी मंगरु होयाम ऊर्फ सुमली (डीव्हीसीएम, प्लाटुन क्रमांक 32), वय 28 वर्षे, रा. पल्ली, ता. भैरमगड, जि. बिजापूर (छ.ग.) 2) पल्लवी केसा मिडीयम ऊर्फ बंडी (पीपीसीएम, प्लाटुन क्रमांक 32), वय 19 वर्षे रा. कोंचल, ता. आवापल्ली जि. बिजापूर (छ.ग.), 3) देवे कोसा पोडीयाम ऊर्फ सबिता (सदस्य, प्लाटुन क्रमांक 32), वय 19 वर्षे रा. मारोट बाकापंचायत ता. आवापल्ली, जि. बिजापूर (छ.ग.) व इतर दोन जहाल माओवादी सदस्य असे असल्याचे उघड झाले. अधिक चौकशी दरम्यान समोर आले आहे की, सदर पाचही इसम हे सक्रिय जहाल माओवादी असून घातपात घडवून आणण्याच्या उद्देशाने ते बिनागुंडा जंगल परिसरात दाखल झाले होते.यावेळी अटक करण्यात आलेल्या माओवाद्यांकडून 01 एसएलआर रायफल, 01 .303 रायफल, 03 सिंगल शॉट रायफल, 02 भरमार बंदुका, 03 वॉकीटॉकी व ईतर साहित्य जप्त करण्यात आले आहे.
शासनाने जाहिर केलेले बक्षीस.
1) महाराष्ट्र शासनाने उंगी मंगरु होयाम ऊर्फ सुमली (डीव्हीसीएम, प्लाटुन क्र. 32) हिच्यावर 16 लाख रूपयांचे बक्षीस जाहिर केले होते.
2) महाराष्ट्र शासनाने पल्लवी केसा मिडीयम ऊर्फ बंडी (पीपीसीएम, प्लाटुन क्र. 32) हिच्यावर 08 लाख रूपयांचे बक्षीस जाहिर केले होते.
3) महाराष्ट्र शासनाने देवे कोसा पोडीयाम ऊर्फ सबिता (सदस्य, प्लाटुन क्र. 32) हिच्यावर 04 लाख रूपयांचे बक्षीस जाहिर केले होते.
4) इतर दोन माओवादी सदस्यांवर महाराष्ट्र शासनाने एकत्रितपणे एकुण 08 लाख रूपयांचे बक्षीस जाहिर केले होते.
सदरची कारवाई विशेष पोलीस महानिरीक्षक (नक्षलविरोधी अभियान) संदिप पाटील, पोलीस उप-महानिरीक्षक गडचिरोली परिक्षेत्र अंकित गोयल, उप-महानिरीक्षक (अभियान) सीआरपीएफ अजय कुमार शर्मा, पोलीस अधीक्षक गडचिरोली. नीलोत्पल, कमांडंट 37 बटा. सिआरपीएफ, दाओ इंजिरकान कींडो, अपर पोलीस अधीक्षक (अभियान) यतिश देशमुख, अपर पोलीस अधीक्षक (प्रशासन) एम. रमेश, अपर पोलीस अधीक्षक, अहेरी सत्य साई कार्तिक, पोलीस उप-अधीक्षक (अभियान) विशाल नागरगोजे व उपविभागीय पोलीस अधिकारी भामरागड अमर मोहिते यांचे मार्गदर्शनाखाली विशेष अभियान पथकाचे अधिकारी व जवान यांनी पार पाडली. यावेळी पोलीस अधीक्षक नीलोत्पल यांनी सदर जंगल परिसरात माओवादविरोधी अभियान आणखी तीव्र करण्याचे संकेत दिले असून, माओवाद्यांना माओवादाची हिंसक वाट सोडून आत्मसमर्पण करुन सन्मानाने जीवन जगण्याचे आवाहन केले आहे.
