गोंदिया,दि.१५ः वडीलांसोबत बाजारात जात असताना भरधाव वेगाने येणाऱ्या बोलेरो पिकअप ट्रकची धडक बसल्याने एका तीन वर्षांच्या मुलीचा दुर्दैवी मृत्यू झाल्याची घटना मंगळवारी गोंदिया तालुक्यातील दासगाव येथे घडली.बालमटोला येथील रहिवासी लक्ष्मीचंद सेवाईवार आपल्या तीन वर्षांच्या मुलीसह दासगाव येथे बाजाराला जात असताना अचानक, एका अज्ञात आणि भरधाव बोलेरो पिकअप ट्रकने त्या मुलीला जोरदार धडक देत वाहनचालकाने घटनास्थळावरून पळ काढला.घटनेनंतर वडील आणि ग्रामस्थांच्या मदतीने तिला तातडीने दासगाव प्राथमिक आरोग्य उपकेंद्रात नेण्यात आले, परंतु उपचारादरम्यान तिचा मृत्यू झाला. पीडित कुटुंबाने रावणवाडी पोलीस ठाण्यात अज्ञात चालकाविरुद्ध तक्रार दाखल केली. अत्यंत व्यथित झालेल्या वडिलांनी मुलीचा मृतदेह रुग्णालयातून पुन्हा अपघातस्थळी आणला आणि रस्त्यावर बसून पोलिसांविरुद्ध घोषणा देत न्यायाची मागणी केली. अखेरीस रावणवाडी पोलीस ठाण्याच्या अधिकाऱ्यांनी (SHO) त्यांची भेट घेतली आणि चालकाला अटक करून वाहन जप्त करण्याची लेखी मागणी कुटुंबाने त्यांच्याकडे केली. त्यानंतर, शवविच्छेदनासाठी पोलिसांच्या वाहनातून मृतदेह गोंदिया येथील जिल्हा रुग्णालयात नेण्यात आले; ही संपूर्ण प्रक्रिया रात्री ९:०० ते पहाटे ३:०० या वेळेत पार पडली. दरम्यान, ग्रामस्थांनी बाजाराच्या दिवशी अवजड वाहनांवर बंदी घालण्याबाबत संबंधित अधिकाऱ्यांकडे वारंवार विनंती करूनही कोणतीही कारवाई करण्यात आली नाही.तसेच, रस्त्यावर यापूर्वी बसवलेले ‘स्पीड ब्रेकर’ अज्ञात व्यक्तींनी काढून टाकले होते आणि जर ते स्पीड ब्रेकर जागेवर असते तर कदाचित हा अपघात टाळता आला असता, असेही त्यांनी नमूद केले.
