मुंबई : आजच्या विज्ञान व तंत्रज्ञान युगात मुंबई विद्यापीठाच्या दूर व मुक्त अध्ययन संस्थेचे (आयडॉल) महत्व अनन्यसाधारण असून तंत्रज्ञानाच्या साहाय्याने आयडॉलने विद्यार्थ्यांना शिक्षणाची संधी प्राप्त करून दिली आहे. मुंबई विद्यापीठाने ५० वर्षांपूर्वी दूरस्थ शिक्षणाची संकल्पना स्वीकारली व ती संकल्पना आजच्या परिस्थितीत किती उपयोगी पडत आहे. हे प्रत्यक्ष कृतीतून आयडॉलने दाखवून दिले आहे. असे प्रतिपादन बॉम्बे स्टॉक एक्सचेन्जचे मुख्य कार्यकारी अधिकारी व व्यवस्थापकीय संचालक आशिषकुमार चौहान यांनी केले. ते मुंबई विद्यापीठाच्या दूर व मुक्त अध्ययन संस्थेच्या ५१ व्या वर्धापनदिनानिमित्त प्रमुख पाहुणे म्हणून बोलत होते.
ते पुढे म्हणाले, शिक्षणापासून वंचित असलेल्या विविध स्तरातील सर्व विद्यार्थाना आयडॉलने शिक्षणाची एक संधी उपलब्ध करून दिली. आयडॉलने नवीन संकल्पना, सृजनशीलता व विद्यार्थ्यांमध्ये अध्ययन प्रेरणेची क्षमता विकसित केली. भविष्यात दूरस्थ शिक्षणाचे उपक्रम भारतीय राष्ट्रनिर्मितीसाठी व सामाजिक विकासासाठी उपयोगी पडतील. त्यामुळे भारताचे स्थान जागतिक स्तरावर सर्वोत्तम असेल.
राज्यपालांच्या आयडॉलला शुभेच्छा
महाराष्ट्र राज्याचे राज्यपाल श्री. भगतसिंग कोश्यारी यांनी आयडॉलच्या ५१ व्या वर्धापनदिनानिमित्त संदेश पाठविला. या संदेशात त्यांनी कोव्हीड – १९ च्या काळात देखील विद्यार्थ्यांनी मुंबई विद्यापीठाच्या दूरस्थ शिक्षणात मोठ्या प्रमाणात प्रवेश घेतला व विशेष करून यामध्ये समाजातील जे आर्थिकदृष्ट्या दुर्बल आहेत त्या विद्यार्थ्यांची संख्या लक्षणीय आहे. असा संदेश देऊन त्यांनी आयडॉलच्या ५१ व्या वर्धापनदिनाला शुभेच्छा दिल्या.
याप्रसंगी बॉम्बे स्टॉक एक्सचेंजचे मुख्य कार्यकारी अधिकारी व व्यवस्थापकीय संचालक श्री. आशिषकुमार चौहान यांच्या हस्ते एकलव्य या अनियतकालिकाचे व आयडॉल एक ओळख या माहितीपुस्तिकेचे प्रकाशन करण्यात आले.
आयडॉलचे संचालक डॉ. प्रकाश महानवर यांनी याप्रसंगी प्रास्ताविक केले. प्रास्ताविकात त्यांनी आयडॉलच्या मागील पन्नास वर्षांचा आढावा घेतला आणि पुढील वर्षांमध्ये अनेक नवीन उपक्रम व अभ्यासक्रम सुरु करण्यात येतील असे सांगितले. या कार्यक्रमाचे अध्यक्ष विद्यापीठाचे प्रभारी कुलसचिव डॉ. बळीराम गायकवाड़ यांनी अध्यक्षीय भाषण केले. तर आयडॉलच्या उपसंचालिका डॉ. मधुरा कुलकर्णी यांनी आभार प्रदर्शन केले.
