गोंदिया, दि.6 : आदिवासी उमेदवारांकरीता कौशल्य विकास, रोजगार व उद्योजकता माहिती व मार्गदर्शन केंद्र, देवरी या कार्यालयाचे स्पर्धा परीक्षा माहिती व मार्गदर्शनाचे सन 2023-24 दुसरे सत्र दिनांक 1 ऑगस्ट ते 15 नोव्हेंबर 2023 या कालावधीसाठी घेण्यात येणार आहे. यासाठी आदिवासी जमातीमधील उमेदवारांनी अर्जासोबत शैक्षणिक पात्रतेचे प्रमाणपत्र, शाळा सोडल्याचा दाखला व जातीचे प्रमाणपत्राच्या छायांकीत प्रतीसह कौशल्य विकास, रोजगार व उद्योजकता माहिती व मार्गदर्शन केंद्र, देवरी या कार्यालयास दिनांक 26 जुलै 2023 पर्यंत अर्ज सादर करावेत.
योजनेचे स्वरुप व उमेदवारांच्या पात्रतेचे निकष पुढीलप्रमाणे आहेत. सदर प्रशिक्षणासाठी उमेदवार हा किमान एस.एस.सी. (10वी) उत्तीर्ण असावा, उच्च शैक्षणिक पात्रताधारक व टंकलेखक/संगणक/लघुलेखक परीक्षा उत्तीर्ण असणाऱ्या उमेदवारास प्राधान्य राहील. उमेदवार आदिवासी जमाती प्रवर्गातील असावा, स्त्री अथवा पुरुष दोन्ही पात्र राहतील. उमेदवारांचे वय किमान 18 वर्षे पूर्ण असावे. उमेदवार हा गोंदिया आणि भंडारा या दोन जिल्ह्यापैकी रहिवासी असावा. उमेदवाराने वरील प्रशिक्षणाचा यापुर्वी लाभ घेतलेला नसावा. उमेदवाराचे रोजगार व स्वयंरोजगार (Employment) कार्यालयाचे ऑनलाईन नोंदणी कार्ड असावे. बँकेत खाते असलेल्या पासबुकच्या पहिल्या पानाची व आधार कार्डची छायांकीत प्रत जोडावी.
प्रशिक्षण कालावधी तीन महिने पंधरा दिवस म्हणजेच दिनांक 1 ऑगस्ट ते 15 नोव्हेंबर 2023 असा राहील. निवड प्राप्त उमेदवारांना देवरी येथे राहण्याची व्यवस्था स्वत:च करावी लागेल. प्रशिक्षणासाठी निवड झालेल्या प्रशिक्षणार्थ्यांना दरमहा 1 हजार रुपये विद्यावेतन देय राहील. असे देवरी येथील कौशल्य विकास, रोजगार व उद्योजकता मार्गदर्शन अधिकारी राजु माटे यांनी कळविले आहे.
