नागपूर : राष्ट्रसंत तुकडोजी महाराज नागपूर विद्यापीठात हेक्झावेअर टेक्नॉलॉजी मिहान नागपूर येथील कंपनीचा प्लेसमेंट ड्राईव्ह पार पडला. महाराज बाग चौक स्थित विद्यापीठाच्या छत्रपती शिवाजी महाराज प्रशासकीय परिसरातील दीक्षांत सभागृहात हा प्लेसमेंट ड्राईव्ह बुधवार, दि. ७ मे २०२५ रोजी घेण्यात आला. चाळणी परीक्षेत १२ विद्यार्थ्यांची निवड करण्यात आली आहे.
यावेळी प्रभारी प्र-कुलगुरू डॉ. सुभाष कोंडावार, ट्रेनिंग व प्लेसमेंट ऑफिसर डॉ. भूषण महाजन, हेक्झावेअर कंपनीचे एचआर अधिकारी ऋतुजा पवार, तयबा खान, मृगांग अंबुलकर यांची यावेळी उपस्थिती होती. प्र-कुलगुरू डॉ. सुभाष कोंडावार यांनी प्लेसमेंट ड्राईव्ह करिता उपस्थित विद्यार्थ्यांना मार्गदर्शन करीत शुभेच्छा दिल्या. ट्रेनिंग व प्लेसमेंट ऑफिसर डॉ. भूषण महाजन यांनी मुलाखतीला आलेल्या विद्यार्थ्यांना प्रोत्साहित केले. हेक्झावेअर टेक्नॉलॉजी कंपनीकडून एक्झिक्युटिव्ह या पदाकरिता मुलाखती घेण्यात आल्या. यामध्ये चाळणी परीक्षेत निवडण्यात आलेल्या १२ विद्यार्थ्यांमधून अंतिम निवड केली जाणार आहे. वैद्यकीय क्षेत्राशी संबंधित पदाबाबत मुलाखती घेतल्या जात असल्याने या प्लेसमेंट ड्राईव्हमध्ये प्राणिशास्त्र तसेच वैद्यकीय शास्त्राशी संबंधित अभ्यासक्रम पूर्ण केलेल्या विद्यार्थ्यांना बोलाविण्यात आले होते. मोठ्या संख्येने विद्यार्थ्यांनी या प्लेसमेंट ड्राईव्हचा लाभ घेतला.
