परभणी, दि. 3 :- जिल्हा वार्षिक योजने अंतर्गत मंजूर नियतव्ययानुसार विविध विकास कामे विहित वेळेत पूर्ण होणे आवश्यक आहे. कालावधी कमी असल्यामुळे ज्या विभागांची तांत्रिक व प्रशासकीय मान्यतेची कार्यवाही अद्याप झालेली नाही, त्यांनी तात्काळ कार्यवाही पूर्ण करुन विकास कामे सुरु करावीत, असे निर्देश जिल्हाधिकारी रघुनाथ गावडे यांनी दिले.
जिल्हाधिकारी कार्यालयात आज जिल्हा वार्षिक योजनेबाबत आढावा बैठक पार पडली. त्यावेळी जिल्हाधिकारी बोलत होते. जिल्हा परिषदेच्या मुख्य कार्यकारी अधिकारी नतिशा माथुर, जिल्हा नियोजन अधिकारी किशोरसिंग परदेशी, समाजकल्याण विभागाच्या सहायक आयुक्त गीता गुट्टे आदींसह विभागप्रमुख यावेळी उपस्थित होते.
जिल्हाधिकारी म्हणाले की, चालू वर्षातील जिल्हा वार्षिक योजनेचा निधी हा विकास कामांवर खर्च करण्यासाठी कमी कालावधी उरला आहे. मंजूर नियतव्ययानुसार विविध विकास कामे विहित वेळेत पूर्ण होणे आवश्यक आहे. कामे गुणवत्तापूर्ण व दर्जेदार व्हावीत. तांत्रिक व प्रशासकीय मान्यतेची कार्यवाही तात्काळ पूर्ण करुन विकास कामे सुरु करावीत. मंजूर संपूर्ण निधीचा विनीयोग करावा. निधी परत जाता कामा नये, याची खबरदारी घ्यावी. सर्व विभागांनी आयपास प्रणालीचा वापर करूनच कार्यवाही पूर्ण करावी, असे निर्देश त्यांनी दिले. बैठकीत सन 2023-24 आणि 2024-25 या वर्षातील कामांचाही आढावा घेण्यात आला. प्रलंबित कामे तात्काळ पूर्ण करण्याबाबत जिल्हाधिकारी यांनी सूचित केले.
