टेक्‍सटाईल पार्कमुळे कृषी क्षेत्रात बदल घडू शकतो – मुख्‍यमंत्री देवेंद्र फडणवीस
berartimes.com
वर्धा, दि.11 – टेक्‍सटाईल पार्कच्‍या माध्‍यमातून शेतकरी आणि उद्योगाच्‍या सहकार्याने कृषी क्षेत्रात बदल घडू शकतेा. शेतीपूरक उद्योग आणि मुल्‍यवर्धित प्रकल्‍पाच्‍या माध्‍यमातून मोठया प्रमाणात शेतक-यांपर्यंत पैसा पोहोचवून त्‍यांच्‍या जीवनात आमुलाग्र बदल घडवण्‍यासाठी शासनाने इंटिग्रेटेड टेक्‍सटाईल पार्क योजना सुरु केली .यामुळे मध्‍यस्‍थांची साखळी दूर होऊन शेतकऱ्यांच्‍या कापसाला चांगला भाव मिळेल असे प्रतिपादन राज्‍याचे मुख्‍यमंत्री देवेंद्र फडणवीस यांनी हिंगणघाट येथे विदर्भातील पहिल्‍या इंटिग्रेटेड टेक्‍सटाईल पार्कच्‍या भूमिपूजन प्रसंगी केले.
हिंगणघाट जवळ वणी येथे असलेल्‍या गिमाटेक्‍स इंडस्टि्रज प्रायव्‍हेट लिमिटेड यांच्‍या हिंगणघाट इंटिग्रेटेड टेक्‍सटाईल पार्कचे भू‍मीपूजन आणि नविन विस्‍तारित स्पिनींग युनीट चे उद्घाटन मुख्‍यमंत्र्यांचे हस्‍ते करण्‍यात आले. यावेळी उपस्थितांना संबोधित करतांना ते बोलत होते. या कार्यक्रमाला राज्‍याचे वित्‍त व नियोजन मंत्री तथा जिल्‍हयाचे पालकमंत्री सुधीर मुनगंटीवार, खासदार रामदास तडस, आमदार समिर कुणावार, डॉ. पंकज भोयर, गिमाटेक्‍स कंपनीचे अध्‍यक्ष
वसंतकुमार मोहता, व्‍यवस्‍थापकीय संचालक प्रशांतकुमार मोहता, अनुरागकुमारमोहता, जिल्‍हाधिकारी शैलेश नवाल, जिल्‍हा पोलिस अधिक्षक अंकित गोयल,भाजपचे जिल्‍हा‍ध्‍यक्ष राजेश बकाने उपस्थित होते.
आज महाराष्‍ट्र हे कापूस उत्‍पादक राज्‍य म्‍हणुन ओळखले जाते. राज्‍यात निर्माण होणा-या कापसापैकी 25 टक्‍के कापसावर प्रक्रिया होते, उर्वरित 75 टक्‍के कापसावर पूरक उद्योगाच्‍या साखळी अभावी आपण प्रक्रिया करु शकत नाही. यासाठी इंटिग्रेटेड टेक्‍सटाईल पार्क ही योजना शासनाने सुरु केली असून त्‍यातील पहिला पार्क विदर्भातील हिंगणघाट येथे सुरु होत असल्‍याबाबत त्‍यांनी मोहता कुंटूबियाचे अभिनंदन केले. यापुढे उद्योजक शेतक-यांकडून थेट कापूस खरेदी करतील. त्‍यामुळे शेतक-यांच्‍या कापसाला चांगला भाव मिळेल. यामध्‍ये कुणाचीही मध्‍यस्‍थी नसल्‍यामुळे थेट शेतक-याला कापसाची परिपूर्ती मिळेल. उद्योग आणि शेतक-यामध्‍ये सहकार्य असेल तर नव-नवीन तंत्रज्ञान शेतक-यापर्यंत पोहचवता येईल. कापसाची उत्‍पादकता वाढविण्‍यासाठी सुध्‍दा उद्योगाने संशोधन करुन ते शेतक-यांपर्यंत पोहचविले पाहिजे असेही मुख्‍यमंत्री यांनी यावेळी म्‍हणाले.
यावेळी बोलतांना पालकमंत्री सुधीर मुनगंटीवार म्‍हणाले,शेतक-याच्‍या जीवनात बदल घडविण्‍यासाठी शासन फार्म टू फॅशन ही संकल्‍पना रा‍बवित आहे. त्‍याचा प्रत्‍यय इंटिग्रेटेड टेक्‍सटाईल पार्क च्‍या माध्‍यमातून आज येत आहे. हिंगणघाट सारख्‍या छोटया शहरात मोहता कुंटूंबियाच्‍या सहा पिढयांपासून कापड प्रक्रिया उद्योग सुरु आहे.यामध्‍ये इंटिग्रेटेड टेक्‍सटाईल पार्कमुळे नविन तंत्रज्ञानाच्‍या माध्‍यमातून उच्‍च गुणतत्‍तेच्‍या कापडाची निर्मिती होईल, असा विश्‍वास त्‍यांनी यावेळी व्‍यक्‍त केला. यावेळी वसंतकुमार मोहता यांनी गिमाटेक्‍स इंडस्‍ट्रीबाबत माहिती दिली. तर अनुरागकुमार मोहता यांनी इंटिग्रेटेड टेक्‍सटाईल पार्कबाबत प्रस्‍तावना केली. यावेळी गिमाटेक्‍स इंडस्‍ट्रीच्‍या वतीने तयार करण्‍यात आलेल्‍या जी फोर्स या अॅपचे लोकार्पण करण्‍यात आले.यावेळी कार्यक्रमाला उद्योजक, नागरिक मोठया संख्‍येने उपस्थित होते.
