जि.प.अध्यक्ष निवडीकरीता चोरखमारा येथे सुरु झाली भाजपची बैठक

0
962

गोंदिया,दि.२४ ः गोंदिया जिल्हा परिषदेच्या पुढील अडीच वर्षांकरिता अध्यक्ष, उपाध्यक्ष पदाकरीता आज २४ जानेवारीला जिल्हा परिषदेच्या स्व.वसंतराव नाईक सभागृहात निवडणूक घेण्यात येत आहे.या निवडणूकीत भारतीय जनता पक्षाकडून अध्यक्ष पदाकरीता कुणाच्या नावाची चिट्टी निघते याकडे लक्ष लागले आहे.भाजपचे पर्यवेक्षक आमदार गिरीश व्यास,संघटन मंत्री उपेंद्र कोठेकर, आमदार डाॅ.परिणय़ फुके, भाजपचे आमदार विजय रहागंडाले,आमदार विनोद अग्रवाल,आमदार संजय पुराम,भाजप जिल्हाध्यक्ष डाॅ.येशुलाल उपराडे,संघटनमंत्री बाळा अंजनकर व भाजपच्या जिल्हा कोअर कमिटीच्या बैठकीत अध्यक्षाच्या नावाला घेत चोरखमारा येथे चर्चा सुरु झाली आहे.जिल्हा परिषदेच्या अध्यक्षपदाकरीता भाजपचे जि.प.गटनेते लायकराम भेंडारकर,डव्वा गटाचे सदस्य डाॅ.भुमेश्वर पटले,मुंडीपार गटाचे सदस्य डाॅ.लक्ष्मण भगत,सेजगाव गटाचे सदस्य पवन पटले  यापैकी कुणाच्या गळ्यात भाजप अध्यक्षपदाची माळ घालते याकडे लक्ष लागले आहे.

आज शुक्रवारी (ता. २४) जिल्हा परिषदेला नवे अध्यक्ष आणि उपाध्यक्ष मिळणार आहेत. ५३ सदस्य संख्या असलेल्या जिल्हा परिषदेत भाजपचे २६ सदस्य, राष्ट्रवादी काॅंग्रेसचे (अजित पवार) आठ, काॅंग्रेसचे १३, चावी संघटनेचे चार, अपक्ष दोन असे पक्षीय बलाबल आहे. भाजप आणि राष्ट्रवादी काॅंग्रेसची महायुती आहे. भाजपचे २६ आणि अपक्ष दोन मिळून २८ सदस्य असल्याने भाजप स्पष्ट बहुमतात आहे. त्यामुळे अध्यक्षपद भाजपकडे राहील, हे निश्चित आहे.