उद्धव ठाकरेंचा बंडखोरांना दणका:शिंदे गटाच्या 5 मंत्री, 4 -राज्यमंत्र्यांचे खात्यांचे फेरवाटप

0
79

मुंबई-एकनाथ शिंदेंच्या नेतृत्वातील शिवसेनेत झालेले बंड मोडून काढण्यासाठी मुख्यमंत्री उद्धव ठाकरे यांनी बंडखोर आमदारांना सर्वात मोठा दणका दिला आहे. त्यांनी शिंदे गटातील 5 मंत्री व 4 राज्यमंत्र्यांची खाती काढून घेऊन ती इतर मंत्र्यांकडे सोपवली आहेत. जनहिताची कामे अविरत सुरू राहण्यासाठी तसेच पावसाळ्यातील संभाव्य अतिवृष्टी व अन्य आपत्तींच्यावेळी सर्वच विभागांची कामे सुरूळीतपणे पार पाडण्यासाठी त्यांनी हा निर्णय घेतला आहे.

शासन कार्यनियमावली नियम 6-अ अंतर्गत निर्णय

महाराष्ट्र शासन कार्यनियमावलीतील नियम 6-अ मध्ये 6-अ अनुपस्थिती, आजारपण किंवा इतर कोणत्याही कारणामुळे आपली कामे पार पाडणे शक्य नसेल त्यावेळी मुख्यमंत्र्यांस आपल्या अनुपस्थितीत आपली सर्व किंवा कोणतीही कामे पार पाडण्याबाबत इतर कोणाही मंत्र्यास निर्देश देता येईल. त्याचप्रमाणे जेव्हा एखाद्या मंत्र्याला आपली कामे पार पाडणे शक्य नसेल तेव्हा त्या मंत्र्याच्या अनुपस्थितीत मुख्यमंत्र्यास इतर कोणाही मंत्र्याला त्याची सर्व किंवा काही कामे पार पाडण्याबाबत निदेश देता येईल अशी तरतूद आहे त्याप्रमाणे हा निर्णय घेण्यात आला आहे.

कुणाचे खाते कुणाकडे?

बंडखोर एकनाथ शिंदे यांच्याकडील नगर विकास, सार्वजनिक बांधकाम (सार्वजनिक उपक्रम) खाती सुभाष देसाई यांच्याकडे, तर गुलाबराव रघुनाथ पाटील यांच्याकडील पाणी पुरवठा व स्वच्छता विभाग खाते अनिल दत्तात्रय परब यांच्याकडे सोपवण्यात आले आहे. तसेच दादाजी दगडू भुसे यांच्याकडील कृषि व माजी सैनिक कल्याण खाते तथा संदिपान आसाराम भुमरे यांच्याकडील रोजगार हमी, फलोत्पादन खाते शंकर यशवंतराव गडाख यांच्याकडे, तर उदय सामंत यांच्याकडील उच्च व तंत्र शिक्षण खाते पर्यावरण मंत्री आदित्य ठाकरे यांच्याकडे सोपवण्यात आले आहे.

राज्य मंत्र्याकडील खातेवाटपात

शंभूराज शिवाजीराव देसाई यांच्याकडील खाती (कंसात) संजय बाबुराव बनसोडे राज्यमंत्री (गृह ग्रामीण), विश्वजित पतंगराव कदम, राज्यमंत्री (वित्त, नियोजन, कौशल्य विकास व उद्योजकता, पणन); सतेज उर्फ बंटी डी. पाटील, (रा.उ.शु.) यांच्याकडे सोपवण्यात आली आहे.

तर राजेंद्र शामगोंडा पाटील यड्रावकर राज्यमंत्री यांच्याकडील खाती (कंसात) विश्वजित पतंगराव कदम, राज्यमंत्री (सार्वजनिक आरोग्य व कुटूंब कल्याण), प्राजक्त प्रसाद तनपुरे, राज्यमंत्री (वैद्यकीय शिक्षण, वस्त्रोद्योग),सतेज उर्फ बंटी डी. पाटील, राज्यमंत्री (अन्न व औषध प्रशासन),आदिती सुनिल तटकरे, राज्यमंत्री (सांस्कृतिक कार्य) यांच्याकडे सोपवण्यात आली आहे.

याशिवाय अब्दुल नबी सत्तार, राज्यमंत्री यांच्याकडील खाती (कंसात) प्राजक्त प्रसाद तनपुरे, राज्यमंत्री (महसूल), सतेज उर्फ बंटी डी. पाटील, राज्यमंत्री (ग्राम विकास), आदिती सुनिल तटकरे, राज्यमंत्री (बंदरे, खार जमिनी विकास, विशेष सहाय्य) यांच्याकडे, तर ओमप्रकाश उर्फ बच्चू बाबाराव कडू, राज्यमंत्री यांच्याकडील खाती( कंसात) आदिती सुनिल तटकरे, राज्यमंत्री (शालेय शिक्षण), सतेज उर्फ बंटी डी. पाटील, राज्यमंत्री (जलसंपदा व लाभक्षेत्र विकास, कामगार), संजय बाबुराव बनसोडे, राज्यमंत्री (महिला व बाल विकास), दत्तात्रय विठोबा भरणे, राज्यमंत्री (इतर मागास बहुजन कल्याण) यांच्याकडे सोपवण्यात आली आहे.

एकनाथ शिंदेंच्या बंडामुळे सरकार अस्थिर

शिवसेना नेते एकनाथ शिंदे यांच्या बंडामुळे राज्यातील दोन्ही काँग्रेस व शिवसेनेचे महाविकास आघाडी सरकार अस्थिर झाले आहे. मुख्यमंत्री तथा शिवसेना पक्षप्रमुख उद्धव ठाकरे यांना हे बंड मोडून काढण्यासाठी कमालीचे कष्ट करावे लागत आहेत. पण, त्यानंतरही पक्षाची गळती रोखण्यात त्यांना यश येत नाहीये. तूर्त विधानसभेच्या उपाध्यक्षांनी 16 बंडखोर आमदारांना बजावलेल्या नोटीसीला सर्वोच्च न्यायालयात आव्हान देण्यात आले आहे. त्यात न्यायालय कोणता निर्णय देते हे पाहणे औत्सुक्याचे ठरणार आहे.