गोंदिया,दि.29ः शिवसेनेचे ज्येष्ठ नेते चंद्रकांत खैरे यांनी आज खळबळजनक खुलासा करीत 3 ते 4 वर्षांपूर्वी मुख्यमंत्री एकनाथ शिंदे हे 15 आमदारांचा गट घेऊन काँग्रेस पक्षात दाखल होणार असल्याची गुप्त बातमी मला खुद्द शिंदे गटाचे आमदार संजय शिरसाटांनीच सांगितल्याचे म्हणाले होते.त्यावर गोंदिया जिल्ह्यात आज हिंदुगर्वगर्जना संपर्क यात्रेनिमित्त आलेले माजी मंत्री विजय शिवतारे यांनी खैरे हे शिवसेनेचे जेष्ठ नेते असून त्यांच्याकडून असा चुकीचा प्रसार योग्य नसल्याचे सांगत शिवसेनेचे आमदार हे काँग्रेसमध्ये कधीही जाण्याचा विचार करु शकत नसल्याचे म्हणाले. ते येथील विश्रामगृहात आयोजित बोलत होते. या पत्रपरिषदेला रामटेकचे खासदार कृपाल तुम्हाणे,पुर्व विदर्भ संपर्कप्रमुख किरण पांडव,गोंदिया जिल्हा प्रमुख सुरेंद्र नायडू,बाप्पी लांजेवार,सुनिल सेंगर उपस्थित होते.पत्रपरिषदेपुर्वी शिंदे गटाचे जिल्हाप्रमुख मुकेश शिवहरे यांच्या निवासस्थानी जाऊन त्यांनी त्यांच्या मातोश्रीचे निधन झाल्याबद्दल सांत्वन केले.
आम्ही कट्टर बाळासाहेबांचे कार्यकर्ते असून बाळासाहेबांनी आपल्या शेवटच्या व्हीडीओ संदेशात काँग्रेसची पंचसुत्री देशात संपवा हा संदेश पहिला दिला.त्यानंतर माझ्यानंतर उध्दव व आदित्यला सांभाळून घ्या असा दिल्याचे सांगत बाळासाहेब कधीही काँग्रेससोबत युतीच्या बाजूने नव्हते असे शिवतारे म्हणाले.काँग्रेससोबत जाण्याची वेळ आली तर आधी शिवसेनेचे दुकान बंद करीन अशी भूमिका बाळासाहेबांची होती.त्यामुळे चंद्रकांत खैरे व काँग्रेसचे अशोक चव्हाण यांनी एकनाथ शिंदे हे काँग्रेससोबत येणार असल्याचे केलेले वक्तव्य पुर्णतःदिशाभूल करणारे असल्याचे पत्रपरिषदेत सांगितले.
काय म्हणाले खैरे?
शि्वसेनेचे नेते चंद्रकांत खैरेंनी थेट मुख्यमंत्री एकनाथ शिंदेंवर आरोप केले आहेत की, शिंदे 15 आमदारांना घेऊन काँग्रेसमध्ये जाणार होते. संजय शिरसाट यांनी काही वर्षांपूर्वी सांगितले होते की, हे बहुतेक फुटणार आहेत. एकनाथ शिंदे 15 आमदारांना घेऊन काँग्रेस पक्षात जाणार आहेत. त्याचप्रमाणे आता अशोक चव्हाणांनी सांगितले तेही खरे आहे. ज्यावेळेस पृथ्वीराज बाबा मुख्यमंत्री असताना हे त्यांच्याकडे चकरा मारत होते. स्वतः एकनाथ शिंदे यात होते.
