शासनाच्या सूचना
26 नोव्हेंबर संविधान दिन
गोंदिया दि. 24: सर्व शासकीय, निमशासकीय तथा सार्वजनिक संस्थांमधील कार्यालयात 26 नोव्हेंबर हा दिवस संविधान दिन म्हणून साजरा करण्यात यावा, असे शासनाचे निर्देश आहेत. त्यानुसार सामान्य प्रशासन विभागाने शासन निर्णय व परिपत्रकामध्ये दिलेल्या सूचनांचे पालन करून संविधान दिवस साजरा करण्यात यावा, असे आवाहन सहाय्यक आयुक्त समाज कल्याण विनोद मोहतुरे यांनी केले आहे.
राज्यात सर्व शासकीय व निमशासकीय कार्यालये, जिल्हा परिषदा, पंचायत समित्या, महानगरपालिका, नगरपालिका, ग्रामपंचायती, महाराष्ट्रातील सर्व प्राथमिक, माध्यमिक व उच्च माध्यमिक शाळा, महाविद्यालयांमध्ये संविधानाच्या उद्देशिकेचे सामुहिक वाचन करण्यात यावे.
संविधानाबाबत जनजागृती व्हावी म्हणून सर्व शाळा, महाविद्यालयांमार्फत त्यादिवशी संविधान यात्रा काढण्यात यावी व त्यामध्ये संविधानाची उद्देशिका, मूलभूत हक्क, कर्तव्ये व जबाबदाऱ्या इत्यादी संविधानातील महत्वाची कलमे ठळकरित्या दिसतील असे बॅनर्स, पोस्टर्स वापरावेत. याबाबत शाळा, महाविद्यालयांमध्ये निबंध, भित्तीपत्रके, सांस्कृतिक कार्यक्रमाचे आयोजन करण्यात यावे.
शासकीय कार्यालये, स्थानिक स्वराज्य संस्थामार्फत संविधानाबाबत जनजागृती व्याख्याने, कार्यक्रम आयोजित करण्यात यावेत. तसेच केंद्रशासनाच्या 7 नोव्हेंबर 2022 च्या पत्राअन्वये “संविधान दिन” म्हणून खालीलप्रमाणे सूचना दिलेल्या आहेत.
उत्सवांचा एक भाग म्हणजे संविधानाच्या प्रस्तावनेचे वाचन आणि त्याची विचारधारा टिकवून ठेवण्याच्या आपल्या वचनबध्दतेची पुष्टी करणे, मागील वर्षाप्रमाणेच राज्य सरकारची सर्व कार्यालये, स्वायत्त संस्था, स्थानिक स्वराज्य संस्था, शैक्षणिक संस्था इत्यादींना 26 नोव्हेंबर रोजी सकाळी 11.00 वाजता आपल्या कार्यालयात संविधानाच्या उद्देशिकांचे सामुहिक वाचन करण्यात यावे. संविधानिक मुल्ये आणि भारतीय राज्यघटनेच्या मूलभूत तत्वावर चर्चा व वेबिनारसह इतर कार्यक्रम देखील आयोजित करावे.
