चंद्रपूर, दि. 5 मे 2025: महावितरणच्या नागपूर प्रादेशिक आंतरपरिमंडलीय नाट्यस्पर्धेत चंद्रपूर परिमंडलाच्या ‘रंग बावरी’ या नाटकाने उत्कृष्ट अभिनयासह सर्वोत्कृष्ट नाटकाचा मान पटकावला. दोन दिवस रंगलेल्या या नाट्यकुंभ-2025 मध्ये ‘रंग बावरी’ने विविध गटांमध्ये तब्बल सहा प्रथम पुरस्कारावर आपली मोहोर उमटवली. अकोला परिमंडलाच्या ‘सिकॅरिअस’ या नाटकाने उपविजेतेपद मिळवले.

या स्पर्धेतील विजेत्या कलाकारांना महावितरणचे संचालक (संचलन) अरविंद भादिकर आणि संचालक (प्रकल्प) प्रसाद रेशमे यांच्या हस्ते गौरविण्यात आले. नागपूर परिक्षेत्राचे प्रादेशिक संचालक परेश भागवत, मुख्य अभियंता सर्वश्री सुहास रंगारी, दिलीप दोडके, ज्ञानेश कुलकर्णी, राजेश नाईक आणि स्वागताध्यक्ष हरिश गजबे यांच्यासह नाट्य परिक्षक विनोद दुर्गेपुरोहित, जयदेव सोमनाथे, अँड. चैताली बोरकुटे यांसारखे मान्यवर उपस्थित होते.

या सोहळ्यात बोलताना संचालक अरविंद भादिकर यांनी नाट्य कलाकारांचे कौतुक केले आणि स्पर्धेनंतरही त्यांनी एकमेकांशी संवाद कायम ठेवण्याचे आवाहन केले. अपयश आले तरी निराश न होता प्रयत्न सुरू ठेवण्याचा संदेश त्यांनी दिला. संचालक प्रसाद रेशमे म्हणाले, “जय-पराजय हा स्पर्धेचा भाग असला तरी, कलाकारांनी आपली कला सादर करताना मिळवलेला आनंद आणि रसिकांना दिलेला आनंद हेच त्यांचे खरे पारितोषिक आहे.” स्पर्धेचे अध्यक्ष तथा प्रादेशिक संचालक परेश भागवत यांनी नाटकांच्या माध्यमातून केवळ आनंदच नव्हे, तर अनेक अनुभव मिळाल्याचे मत व्यक्त केले.

नाट्यकुंभ-2025 चे उद्घाटन महावितरणचे संचालक (मानव संसाधन) राजेंद्र पवार यांच्या शुभहस्ते झाले होते. यावेळी बोलतांना त्यांनी महावितरणमधील अधिकारी व कर्मचाऱ्यांच्या दैनंदिन कामातील या अनमोल अनुभवांना नाट्यकृतींच्या माध्यमातून समाजासमोर आणावे, अशी अपेक्षा व्यक्त केली. महावितरण एक मोठा परिवार आहे आणि या कुटुंबातील सदस्यांमध्ये अनेक उत्कृष्ट कलागुण दडलेले आहेत. दैनंदिन कामाचा व्याप सांभाळूनही कर्मचाऱ्यांनी आपली कला जोपासली आहे, हे कौतुकास्पद आहे. ‘नाट्यकुंभ’ सारख्या स्पर्धांमुळे या कलाकारांना त्यांची प्रतिभा सादर करण्याची संधी मिळते. यासोबतच, अधिकारी आणि कर्मचाऱ्यांमध्ये सुसंवाद वाढतो आणि सांघिक भावना अधिक दृढ होते, असे मत त्यांनी व्यक्त केले. आपल्या भाषणातून राजेंद्र पवार यांनी विदर्भातील नाट्य परंपरेचाही विशेष उल्लेख केला.

चंद्रपूर परिमंडलाचे मुख्य अभियंता हरिश गजबे यांनी निर्मिती केलेल्या, श्रीपाद जोशी लिखित आणि संध्या चिवंडे दिग्दर्शित ‘रंग बावरी’ या नाटकाने रसिकांच्या मनाचा ठाव घेतला. तर, अकोला परिमंडलाचे मुख्य अभियंता राजेश नाईक निर्मित, डॉ. चंद्रकांत शिंदे लिखित आणि नितीन नांदुरकर दिग्दर्शित ‘सिकॅरिअस’ या सस्पेन्स थ्रिलर नाटकाने प्रेक्षकांना खिळवून ठेवले. नागपूर परिमंडलाचे मुख्य अभियंता दिलीप दोडके निर्मित, प्रदीप फाटक लिखित आणि हेमराज ढोके दिग्दर्शित ‘ये रे घना’ आणि गोंदिया परिमंडलाचे मुख्य अभियंता सुहास रंगारी निर्मित, अतुल साळवे लिखित व राजेंद्र गिरी दिग्दर्शित ‘दि ॲनॉनिमस’ या नाटकांनाही रसिकांचा चांगला प्रतिसाद लाभला.

या नाट्यस्पर्धेसाठी अकोला, अमरावती, नागपूर, चंद्रपूर आणि गोंदिया परिमंडलातील वरिष्ठ अधिकारी आणि नाट्यप्रेमी मोठ्या संख्येने उपस्थित होते.

स्पर्धेचा अंतिम निकाल:

• सर्वोत्तम नाटक:
  • प्रथम: ‘रंग बावरी’ (चंद्रपूर परिमंडल)
  • द्वितीय: ‘सिकॅरिअस’ (अकोला परिमंडल)
• दिग्दर्शन:
  • प्रथम: संध्या चिवंडे (‘रंग बावरी’)
  • द्वितीय: नितीन नांदुरकर (‘सिकॅरिअस’)
• अभिनय (पुरुष):
  • प्रथम: गणेश राणे (रघुपती – ‘सिकॅरिअस’)
  • द्वितीय: सुमित खोरगडे (सुभाष – ‘ये रे घना’)
• अभिनय (स्त्री):
  • प्रथम: रोहिणी ठाकरे (नेहा – ‘रंग बावरी’)
  • द्वितीय: स्नेहांजली तुंबडे (स्मिता – ‘ये रे घना’)
• नेपथ्य:
  • प्रथम: रमेश सानप (‘रंग बावरी’)
  • द्वितीय: गजानन जैवाल (‘दि ॲनॉनिमस’)
• प्रकाश योजना:
  • प्रथम: प्रकाश खांडेकर (‘रंग बावरी’)
  • द्वितीय: विवेकानंद वाध (‘सिकॅरिअस’)
• पार्श्वसंगीत:
  • प्रथम: राकेश बोरोवार (‘रंग बावरी’)
  • द्वितीय: योगेश सोनुने (‘सिकॅरिअस’)
• रंगभूषा-वेशभूषा:
  • प्रथम: पौर्णिमा कदम (‘सिकॅरिअस’)
  • द्वितीय: आनंद जैं (‘दि ॲनॉनिमस’)
• उत्तेजनार्थ पारितोषिक:
  • सामली सायंकाळ (मेधना – ‘रंग बावरी’)
  • अमित पेढेकर (डॉ. विध्वंस – ‘ये रे घना’)
  • नावेद शेख (जरासंघ – ‘दि ॲनॉनिमस’)
  • संतोष पाटील (इन्स्पेक्टर कश्यप – ‘सिकॅरिअस’)

गोंदिया, दि.5 : शासनाने ‘गाळमुक्त धरण व गाळयुक्त शिवार’ ही योजना कायमस्वरुपी राबविण्याचा निर्णय घेतला आहे. या योजनेच्या प्रचार-प्रसार व जनजागृती करण्यासाठी गोंदिया जिल्हा व संपूर्ण महाराष्ट्रामध्ये भारतीय जैन संघटन व सहयोगी सुहाना स्पाईसेस यांच्याद्वारे गोंदिया जिल्ह्यामध्ये जनजागृती करणाऱ्या जलरथाचे उद्घाटन मुख्य कार्यकारी अधिकारी एम.मुरुगानंथम व निवासी उपजिल्हाधिकारी भैय्यासाहेब बेहेरे यांच्या प्रमुख उपस्थितीत करण्यात आले.

       यावेळी जिल्हा जलसंधारण अधिकारी सत्यजीत राऊत, सहायक अधीक्षक संजय धार्मिक, सहायक महसूल अधिकारी सर्वश्री पी.झेड.बिसेन, अमोल गजभिये, नोकलाल कटरे, माधुरी मेश्राम, सोनाली भोयर, हरिश्चंद्र पौनीकर (डीपीएम), योगेश वैकुंठी (नरेगा), बिजेएस पदाधिकारी गोरेगाव सौरभ जैन, बिजेएस जिल्हा समन्वयक रोशन गायधने उपस्थित होते.

       जलरथाद्वारे गावा-गावामध्ये जाऊन तलावाचे पुनरुज्जीवन करण्याकरीता माहिती देवून मागणी अर्ज करण्याकरीता महाराष्ट्र शासनाचे शिवार पोर्टल व बिजेएस ॲपची माहिती देऊन मागणी अर्ज करण्याबाबत, शेतकऱ्यांना मिळणाऱ्या मोफत गाळाचे महत्व, तलावाचे पुनरुज्जीवन करण्याचे फायदे, शेत शिवारामध्ये माती टाकल्याने होणारे फायदे इत्यादी माहिती जलरथाद्वारे पुरविली जाणार आहे.

       तलावातील गाळ काढण्याचा संपूर्ण खर्च शासन करणार असून यासाठी महाराष्ट्र राज्यात एकच दर निश्चित करण्यात आलेला आहे. पात्र स्वयंसेवी संस्था किंवा ग्रामपंचायत या कामासाठी अर्ज करुन जिल्हा प्रशासनाने दिलेल्या पध्दतीनुसार काम करता येईल. तलावातून काढलेला गाळ शेतात टाकण्यासाठी अल्प व अत्यल्प भूधारक शेतकरी, विधवा, अपंग शेतकरी व आत्महत्याग्रस्त कुटूंब शेतकऱ्यांना शासनाकडून निश्चित दराने अनुदान दिले जाणार आहे.

 गोंदिया, दि.5 : अन्न व औषध प्रशासन गोंदिया कार्यालयास प्राप्त झालेल्या गुप्त माहितीच्या आधारे दि.3 मे 2025 रोजी अन्न सुरक्षा अधिकारी पी.व्ही.मानवतकर यांनी गोंदिया शहरातील मेसर्स माँ शक्ती एजन्सीज, घमंडी बिअरबार जवळ, भैरव बाबा मंदिर समोर, बावली, गोंदिया या ठिकाणी छापा टाकून भेसळीच्या संशयावरुन बालाघाट येथून आलेला ‘टोस्ट’ हमसफर ब्रॉण्डचा नमूना घेवून उर्वरित साठा 88 किलो, किंमत 3520 रुपये जप्त केला. सदरचे टोस्ट हे 6 किलोच्या कारटुन बॉक्समध्ये विक्रीस असल्याचे निदर्शनास आले. टोस्ट या अन्नपदार्थाच्या बॉक्सवर उत्पादकाचा पूर्ण पत्ता, उत्पादन दिनांक, बॅच नंबर, FSSAI परवाना क्रमांक नमूद नसल्याचे आढळून आले. सदर प्रकरणी विक्रेता अशोककुमार रहानदोमल ज्ञानचंदानी यांच्याकडून नमूना घेण्यात आलेला आहे व पुढील कार्यवाही सुरु आहे.

        अन्नपदार्थ खरेदी करतांना त्याच्या वेष्टनावर (बॅग/बॉक्सवर) उत्पादकाचा पूर्ण पत्ता, उत्पादन दिनांक, बॅच नंबर, सदर अन्नपदार्थाचा सर्वोत्तम कालावधी, FSSAI परवाना क्रमांक नमुद असलेले अन्नपदार्थच खरेदी करावेत. अन्नपदार्थ ज्या नावाने खरेदी केले आहे त्याचे खरेदी बील स्वत:कडे ठेवावे, असे आवाहन सहायक आयुक्त, अन्न व औषध प्रशासन, गोंदिया यांनी केले आहे.

गोरेगाव,दि.०५ः-मांडोदेवी देवस्थान येथे विविध कार्यकारी सेवा सहकारी संस्थाची बैठक आयोजित करण्यात आली होती.या सभेत सेवा सहकारी संस्थाना नफ्यात आण्याकरीता सर्वांनी प्रयत्न करावे तसेच जिल्हा बँकेत संस्थांचे असलेले अधिकार मिळावे अशी भूमिका गोंंदिया जिल्हा मध्यवर्ती बँकेचे संचालक रेखलाल टेंंभरे यांनी मांडली.सभेला को-ऑप. बॅंकेचे संचालक रेखलाल टेंभरे,विविध कार्य.सेवा सहकारी संस्था संघटना जिल्हा अध्यक्ष डोमा बोपचे,खरेदी विक्रीचे अध्यक्ष जगदिश येरोलो,केवलभाऊ बघेले,विजय राणे,गोदिया तालुकाअध्यक्ष लखन मेंढे,दुर्गाप्रसाद ठाकरे,तिरोडा अध्यक्ष विलास मेश्राम,हंसराज रहांगडाले,गोरेगाव ता.अध्यक्ष किशोर ठाकरे,ओम पटले,पुनेश बोपचे,वेकंट कटरे,योगराज पारधी,पन्नालाल बोपचे आणि तालुका अध्यक्ष व प्रतिनिधी उपस्थि होते.सभेचे संचालन डॉ योगश हरिनखेडे यांनी केले सभेची प्रस्तावना मोरगाव अर्जनीचे तालुका अध्यक्ष ललीत बाळबुद्धे यांनी केली.सभेचे व्यवस्थापन उपाध्यक्ष शंकर पटले यानी केले.आभार प्यारेलाल गौतम यानी मानले.

चित्रा कापसे
तिरोडा – तालुक्यातील घोगरा-पाटीलटोला ते देव्हाळा खुर्द(तुमसर) रस्त्यावर वनविभाग तुमसर मोहाडी यांनी आज दिनांक ४/५/२०२५ ला जेसीबी च्या साह्याने रस्त्यावर नाली खोदून रस्ता रहदारीस बंद केला त्यामुळे सामान्य जनतेचे हाल होत आहेत.
एलोरा (देव्हाडा खू.) – पाटील टोला- घोगरा- ते घाटकुरोडा ते चांदोरी बूज – बिरोली- मांडवी – मुंडिपार – बेलाटी बूज ते तहसील कार्यालय तिरोडा हा अंदाजे २०० वर्षा पूर्वी पासून अस्तित्वात असलेला संयुक्त भंडारा व गोंदिया जिल्ह्यातील रस्ता ह्या पूर्वी सन २००७ -२००८ या वर्षी प्रधान मंत्री ग्राम सडक योजना अंतर्गत तुमसर ते तिरोडा मुख्य रस्ता देव्हाडा खू. येथ पर्यंत खडीकरण व डांबरीकरण चे करण्यात आले आहे. सन २०२४ मध्ये विजय भाऊ रहांगडाले आमदार तिरोडा यांनी परिसरातील विद्यार्थी , शेतकरी, मजूर व भंडारा, नागपूर जिल्ह्यातील जनतेची सतत ची मागणी व आक्रोश बघता सदर रस्ता मुख्य मंत्री ग्राम सडक योजना अंतर्गत मंजुरी प्रदान केली असून सदर रस्ता बांधकाम सुरू आहे व जवळ जवळपास ९० टक्के बांधकाम पूर्णत्वास आले आहे. परंतु देव्हाडा खू येथील ग्राम पंचायत चे पदाधिकारी यांनी वन विभागाच्या अधिकाऱ्यांना वारंवार तक्रारी करून सदर रस्त्यावर आज JCB च्या साहाय्याने खोदून आडवी नाली तयार आहे व सदर रस्ता रहदारीस बंद करण्यात आला आहे. करीता याबाबत जिल्हाधिकाऱ्यांनी सबंधित अधिकाऱ्यांनी तसेच व पदाधिकाऱ्यांनी जातीने लक्ष घालून तत्काळ प्रभावाने रस्ता रहदारीस सुरू करावा अशी परिसरातील नागरिकांची मागणी आहे.