नागपूर-काँग्रेस, भाजपा पुन्हा काँग्रेस असा प्रवास केलेल्या आशिष देशमुख यांनी आता पुन्हा भाजपात प्रवेश केला आहे. भाजपाचे प्रदेशाध्यक्ष चंद्रशेखर बावनकुळे आणि उपमुख्यमंत्री देवेंद्र फडणवीस यांच्या प्रमुख उपस्थितीत हा पक्षप्रवेश झाला. काँग्रेसमधून हकालपट्टी करण्यात आल्यापासून त्यांच्या भाजपा प्रवेशाच्या चर्चा सुरू होत्या.अखेर आज (१८ जून) ते भाजपात सामील झाले.
आशिष देशमुख यांनी भाजपा प्रवेशाआधी शनिवारी (१७ जून) केंद्रीय मंत्री आणि भाजपा नेते नितीन गडकरी यांचीही भेट घेतली होती. यावेळी ते म्हटले होते, “मी कुठल्याही पदाची मागणी केली नाही. मी कार्यकर्ता म्हणून आणि पक्ष जी जबाबदारी देईल ते करत राहणार आहे. श्रद्धा आणि सबुरीनेच माझी पुढील राजकीय वाटचाल राहील. माझी राजकीय वाटचाल कोण्या एका मतदारसंघासाठी केली नाही. विदर्भाच्या हितासाठी मी काम करणार आहे.”
काँग्रेसचे माजी प्रदेशाध्यक्ष रणजित देशमुख यांचे आशिष देशमुख हे पुत्र. राजकीय धडे त्यांनी काँग्रेसमध्ये गिरविले. मग त्यांनी भाजपामध्ये प्रवेश केला. भाजपात असताना आमदार म्हणून निवडून आले. मात्र, भाजपात त्यांचं पटलं नाही म्हणून आमदारकीचा राजीनामा दिला. भाजपा सोडल्यानंतर त्यांनी पुन्हा काँग्रेसमध्ये प्रवेश केला, पण तेथेही अन्य कोणाशी फारसे पटले नाही. आता पुन्हा त्यांनी भाजपाचा मार्ग पत्करला आहे.
