मुख्यमंत्री एकनाथ शिंदेंना मोठा धक्का!
रत्नागिरी – मुख्यमंत्री एकनाथ शिंदे यांच्या जवळचे मानले जाणारे मंत्री उदय सामंत यांच्या भावाने व्हॉट्सअपला ठेवलेल्या एका स्टेटसनं अनेक चर्चांना उधाण आले आहे.एकनाथ शिंदे यांनी उद्धव ठाकरेंच्या विरोधात पाऊल उचलल्यानंतर उदय सामंत यांनी एकनाथ शिंदेंसोबत राहण्याचा निर्णय घेतला. उदय सामंत यांचे बंधू किरण सामंत हेदेखील भाऊ उदय सामंत यांच्यासोबत राजकारणात सक्रीय झाले. परंतु त्यांनी ठेवलेल्या स्टेटसने एकनाथ शिंदेंना धक्का बसला आहे.
उदय सामंत यांचे बंधू किरण सामंत यांनी त्यांच्या व्हॉट्सअप स्टेटसला “मशाल” चिन्ह आणि त्याखाली उद्धव बाळासाहेब ठाकरे असा उल्लेख करणारा फोटो ठेवला.त्यामुळे किरण सामंत हे ठाकरे गटात प्रवेश करणार का अशी चर्चा सुरू झाली. किरण सामंत हे लोकसभेसाठी इच्छुक आहेत. परंतु सिंधुदुर्ग-रत्नागिरी मतदारसंघ लढवण्यासाठी भाजपा आग्रही आहे. त्यातूनच किरण सामंत यांनी हे संकेत दिले असावे असं बोलले जात आहे.
कोण आहेत किरण सामंत?
किरण उर्फ भैय्या सामंत हे मंत्री उदय सामंत यांचे बंधू आहेत. राज्यात शिंदे सरकार आल्यानंतर किरण सामंत यांची सिंधुरत्न योजनेच्या सदस्यपदी नेमणूक करण्यात आली होती. रत्नागिरी मतदारसंघात उदय सामंत चार वेळा निवडून आलेत त्यामागे किरण सामंत यांचाही मोठा वाटा आहे. रत्नागिरी-सिंधुदुर्गच्या राजकारणात ते सक्रीय आहेत. किरण सामंत हे व्यावसायिक आहेत. आजपर्यंत त्यांनी कुठलेही राजकीय पद घेतले नव्हते परंतु शिंदे सरकार राज्यात आल्यानंतर ते कोकणातील सिंधुरत्न योजनेचे सदस्य बनले. किरण सामंत हे उदय सामंत यांचे मोठे बंधू आहेत. ते राजकारणात फ्रंटला नसले तरी पडद्यामागून सूत्रे त्यांच्या हातात असतात. मतदारसंघात दांडगा जनसंपर्क, कार्यकर्त्यांच्या गाठीभेटी, अडलेल्या लोकांची कामे करणे यातून ते सतत कार्यरत असतात. रत्नागिरी-सिंधुदुर्ग इथं त्यांचा चांगला जनसंपर्क आहे.
