चंद्रपूर: जिल्ह्यातील वर्धा नदीच्या काठावर असलेल्या शेतात मौर्य ते सातवाहन काळखंडातील अवशेष सापडत आहेत. त्यात टेराकोटाचे मणी, घरगुती वापरातील भांड्यांचे तुकडे, दगडी हत्यार, तांब्याच्या मूर्ती आदींचा समावेश आहे.
चंद्रपूर जिल्ह्यातून वैनगंगा, वर्धा, अंधारी, उमा, पैनगंगा नद्या वाहतात. प्राचीन काळात नदी काठावर वस्त्या असायच्या. या वस्त्याचे अवशेष आजही सापडते. गोंडपिपरी तालुक्यात येणाऱ्या वेडगाव शेतशिवारात वर्धा नदीच्या काठावरील वसंता चिताडे यांच्या शेतात प्राचीन वस्तीचे अवशेष सापडले आहेत. ते वाकाटक काळातील असण्याचा अंदाज अभ्यासक प्रा. सुरेश चोपणे यांनी व्यक्त केला आहे. नदीचा दुसऱ्या काठावर तेलंगणा राज्यातील गावे आहेत. प्राचीन काळात नदी मार्गाने वाहतूक केली जायची. त्यामुळे येथे नाका असावा अशी शक्यता चोपणे यांनी वर्तविली आहे.गोंडपिपरी तालुक्यातील गावागावात ऐतिहासिक वस्तू सापडतात. वेडगाव येथे सापडत असलेल्या वस्तू गोंडपिपरी तालुक्यातील इतिहासात भर टाकणाऱ्या आहेत. या रिठाचे उत्खनन पुरातत्व विभागाने करावे, अशी मागणी ऐतिहासिक वारसा संवर्धन समितीचे अध्यक्ष अरुण झगडकर यांनी केली.
