नागपूर ब्यूरो: दारिद्र्य आणि उपचाराचा मोठा खर्च यांमुळे ग्रामीण व रोजंदारीवर काम करणाऱ्या कुटुंबांना अनेकदा गंभीर आजारांकडे दुर्लक्ष करावे लागते. मात्र, नागपूर येथील ‘ऑल इंडिया इन्स्टिट्यूट ऑफ मेडिकल सायन्सेस’ (एम्स) मधील पेडियाट्रिक एनसीडी (NCD) क्लिनिक सर्वसामान्य आणि गरीब कुटुंबांसाठी संजीवनी ठरत आहे. दमा (Asthma) आणि अॅलर्जिक रायनायटिस (Allergic Rhinitis) यांसारख्या आजाराने त्रस्त असलेल्या गौरी (नाव बदललेले) या ८ वर्षांच्या चिमुकलीवर ‘एम्स’मध्ये यशस्वी उपचार करण्यात आले असून, तिला या त्रासातून मोठा दिलासा मिळाला आहे.
वारंवार होणारा खोकला, सर्दी; एम्समध्ये अचूक निदान गौरीला लहानपणापासूनच वारंवार तीव्र खोकला आणि सर्दीचा त्रास होत होता. रोजंदारीवर पोट भरणाऱ्या तिच्या पालकांनी सुरुवातीला याकडे सामान्य आजार म्हणून पाहिले आणि स्थानिक पातळीवर उपचार घेतले. मात्र, काहीही फरक न पडल्याने अखेर त्यांनी ‘एम्स’ नागपूर गाठले. तेथील तज्ज्ञ डॉक्टरांनी सखोल तपासणी करून तिला ‘दमा’ आणि ‘अॅलर्जिक रायनायटिस’ असल्याचे निदान केले. त्यानंतर पुढील उपचारांसाठी तिला बालरोग एनसीडी क्लिनिकमध्ये पाठवण्यात आले.
डॉ. अभिषेक मधुरा यांच्या मार्गदर्शनात सर्वसमावेशक उपचार बालरोग तज्ज्ञ डॉ. अभिषेक मधुरा आणि त्यांच्या वैद्यकीय पथकाने गौरीवर विशेष लक्ष केंद्रित करून उपचार सुरू केले. रोजंदारीवर काम करणाऱ्या तिच्या पालकांची आर्थिक स्थिती विचारात घेऊन त्यांना खालीलप्रमाणे परिपूर्ण वैद्यकीय सेवा व मार्गदर्शन पुरवण्यात आले:
-
योग्य औषधोपचार व इन्हेलर तंत्र: चिमुकलीला योग्य औषधे देण्यासोबतच ‘इन्हेलर’ वापरण्याचे अचूक प्रात्यक्षिक पालकांना आणि तिला शिकवण्यात आले.
-
आजाराची लक्षणे व ट्रिगर ओळखणे: दम्याचा त्रास कशामुळे वाढू शकतो (धूळ, हवामानातील बदल इत्यादी) आणि या घटकांपासून बालकाचा बचाव कसा करावा, याचे सविस्तर समुपदेशन करण्यात आले.
-
नियमित पाठपुरावा (Follow-up): आजारावर पूर्ण नियंत्रण मिळवण्यासाठी आणि उपचारांमधील प्रगती तपासण्यासाठी नियमित फॉलो-अप निश्चित करण्यात आले.
बालकीच्या आरोग्यात सुधारणा, पालकांचा विश्वास वाढला ‘एम्स’च्या डॉक्टरांनी दिलेल्या व्यक्तिगत लक्ष आणि मार्गदर्शनामुळे आता गौरीच्या आरोग्यात मोठी सुधारणा झाली आहे. तिच्या आजाराची लक्षणे पूर्णपणे नियंत्रणात आली असून तिचे जीवनमान सुधारले आहे. या आजाराचे घरीच व्यवस्थापन कसे करावे, याबाबत आता पालकही आत्मविश्वासी झाले असून त्यांनी ‘एम्स’ नागपूरच्या डॉक्टरांचे आणि कर्मचाऱ्यांचे मनःपूर्वक आभार मानले आहेत.
