आता दर गुरुवारी भरणार सालेकसा येथे गुजरी बाजार

सालेकसा,दि.27ः-वाढती लोकसंख्या व व्यापार लक्षात घेत नवीन वर्षापासून नगरपंचायतीच्या हद्दीत आठवडी बाजार व्यतिरिक्त दर गुरुवारी गुजरी बाजार भरणार आहे.
सालेकसा येथील बाजार चौकात दर सोमवारी आठवडी बाजार भरतो. परंतु, गावातील वाढती लोकसंख्या आणि व्यापार लक्षात घेऊन गावकर्‍यांच्या पुढाकाराने आणि शेतकर्‍यांच्या मदतीने आता आठवड्यात दर गुरुवारी गुजरी बाजार तहसील कार्यालयजवळील खुल्या मैदानात भरणार आहे. २ जानेवारी रोजी याचे औपचारिक उद््घाटन नगरपंचायतमार्फत केले जाणार आहे.
या गुजरीमुळे शेतकर्‍यांना त्यांचा शेतमाल सरळ ग्राहकांपयर्ंत विकता येईल. तर ग्राहकांना ताजी भाजी मिळणार आहे. परिसरातील शेतकर्‍यांना व छोट्या प्रमाणात भाजीपाल्याची शेती करणार्‍याना येत्या दोन तारखेपासून साप्ताहिक गुजरीच्या निमित्ताने आपले साहित्य ग्राहकांना विक्रीसाठी उपलब्ध करावे असे आवाहन करण्यात आले आहे.