गडचिरोली,दि.08: जिल्ह्यातील नक्षलग्रस्त भागात आता महिला पोलीस तैनात करण्यात आल्या आहेत. नक्षलग्रस्त भागातील चौक्या आणि गस्तीवर त्यांची नेमणूक करण्यात आली आहे. त्यामुळं येत्या काळात या महिला पोलीस नक्षलवाद्यांशी सामना करणार आहेत.दलातील महिला कर्मचारी आता मोठ्या संख्येनं नक्षलग्रस्त भागात तैनात करण्यात आल्या आहेत. या महिला पोलीस आता नक्षलवाद्यांशी दोन हात करताना दिसतील. नक्षलग्रस्त भागातील चौक्यांमध्ये या महिला पोलिसांच्या नेमणुका करण्यात आल्या आहेत. गडचिरोलीचे पोलीस अधीक्षक शैलेश बलकवडे यांनी याबाबत माहिती दिली. गडचिरोली पोलीस दलात ३० टक्के जागा महिलांसाठी राखीव आहेत. स्थानिक महिलांसाठी या जागा राखीव आहेत. या महिला पोलिसांच्या नियुक्त्या नक्षलग्रस्त भागातील चौक्यांमध्ये करण्यात आल्या आहेत. तसंच गस्ती पथकातही त्यांचा समावेश करण्यात आला आहे. नक्षलग्रस्त भागात त्या गस्त घालताना दिसतील. याशिवाय नक्षलवादविरोधी मोहिमांमध्येही त्या सहभागी होणार आहेत, अशी माहिती पोलीस अधीक्षक बलकवडे यांनी दिली.
