गडचिरोली,दि.07ः-शासनाने जाहीर केलेल्या आत्मसमर्पण योजनेमुळे तसेच हिंसाचाराच्या जीवनाला कंटाळून वरिष्ठ माओवाद्यांसह अनेक जहाल माओवाद्यांनी आजपर्यंत आत्मसमर्पण केलेले आहे. त्याचबरोबर आत्मसमर्पित माओवाद्यांचे पोलीस दलाने पुनर्वसन घडवून आणल्यामुळे आजपर्यंत एकुण 586 माओवाद्यांनी गडचिरोली पोलीस दलासमोर आत्मसमर्पण केले आहे. नुकतेच नक्षल दलममधील जेष्ठ माओवाद्यांकडुन स्त्रीयांना भेदभावजनक वागणूकीला कंटाळून 11 लाख रुपये बक्षीस असलेली जहाल महिला माओवादी नामे रजनी ऊर्फ कलावती समय्या वेलादी, वय 28 वर्ष रा. ईरुपगुट्टा, पो. भोपालपट्टनम जि. बिजापूर (छ.ग.) हिने पोलीस अधीक्षक नीलोत्पल यांच्या समोर आत्मसमर्पण केले.
आत्मसमर्पीत महिला माओवादी नामे रजनी ऊर्फ कलावती समय्या वेलादी हि ऑगस्ट 2009 ला फरसेगड दलममध्ये सदस्या पदावर भरती होऊन सन 2010 पर्यंत कार्यरत होती.सन 2010 ला ओरच्छा दलममध्ये बदली होऊन सन 2013 पर्यंत कार्यरत होती.सन 2013 ला नॅशनल पार्क एरीया डॉक्टर टीममध्ये बदली होऊन एसीएम (एरीया कमीटी मेंबर) पदावर पदोन्नती होऊन सन 2015 पर्यंत कार्यरत होती. तर सन 2015 ला सांड्रा दलममध्ये बदली होऊन आत्मसमर्पणाच्या तारखेपर्यंत या दलममध्ये ती कार्यरत होती.
या जहाल महिला माओवादीवर खुण,जाळपोळ, चकमकीच्या 6 गुन्ह्यांची नोंद आहे.त्यामध्ये सन 2015 मध्ये मौजा गुंडम जंगल परिसरातील चकमकीमध्ये सहभाग.सन 2017 साली मौजा बेज्जी ते येर्रागुफा मार्गावरील अॅम्ब्युश/चकमकीमध्ये सहभाग. यामध्ये डीआरजी (छ.ग.) चे 12 पोलीस जवान शहिद झाले होते.सन 2018 मध्ये मौजा मारेवाडा जंगल परिसरातील चकमकीमध्ये सहभाग.व सन 2019 मध्ये मौजा बोरामज्जी जंगल परिसरात झालेल्या चकमकीमध्ये सहभाग होता. यात सन 2020-21 मध्ये मौजा उपराल (छत्ती.) येथील एका निरपराध इसमाच्या खुनात तिचा प्रत्यक्षरित्या सहभाग होता.तसेच सन 2018 मध्ये मौजा बेद्रे रोडवर सरकारी बसची जाळपोळ करण्यात तिचा सहभाग होता.
शासनाने जाहिर केलेले बक्षीस.
महाराष्ट्र शासनाने रजनी ऊर्फ कलावती समय्या वेलादी हिचेवर 06 लाख रूपयाचे बक्षीस जाहिर केले होते.
छत्तीसगड सरकारने रजनी ऊर्फ कलावती समय्या वेलादी हिचेवर 05 लाख रूपयाचे बक्षीस जाहिर केले होते.
आत्मसमर्पणानंतर शासनाकडून मिळणारे बक्षीस.
आत्मसमर्पणानंतर पुनर्वसनाकरीता केंद्र व राज्य शासनाकडुन रजनी ऊर्फ कलावती समय्या वेलादी हिला एकुण 4 लाख 50 हजार रुपये बक्षीस जाहिर केले आहे.
गडचिरोली पोलीस दलाने अतिशय प्रभावीपणे नक्षलविरोधी अभियान राबविल्यामुळे तसेच शासनाने नक्षलवाद्यांना आत्मसमर्पणाची सुवर्णसंधी उपलब्ध करून दिल्याने, सन्मानाने जीवन जगण्यासाठी सन 2022 ते 2023 सालामध्ये आतापर्यंत एकुण 13 जहाल माओवाद्यांनी आत्मसमर्पण केले आहे. विकासकामांना आडकाठी निर्माण करणाया नक्षलवाद्यांवर पोलीस दल सक्षमपणे कारवाई करण्यास तत्पर असुन, जे माओवादी विकासाच्या प्रवाहात सामील होण्यास ईच्छुक असतील त्यांना विकासाच्या मुख्य प्रवाहात आणण्यासाठी तसेच लोकशाहीतील सन्मानाचे जीवन जगण्यासाठी गडचिरोली पोलीस दल सर्वतोपरी मदत करेल, तसेच त्यांनी हिंसेचा त्याग करुन शांततेचा मार्ग स्विकारावा असे आवाहन मा. पोलीस अधीक्षक गडचिरोली नीलोत्पल यांनी केले आहे.
