‘नासुप्र’तील दस्तावेज चोरून प्लाॅट विकणाऱ्या टोळीचा पर्दाफाश; ११ आरोपींना अटक

0
10

नागपूर : नागपूर सुधार प्रन्यासमधून (नासुप्र) जुने दस्तावेजांची चोरी करत बनावटी कागदपत्रांवरून प्लाॅटची विक्री करणाऱ्या टोळीचा पोलिसांनी पर्दाफाश केला आहे. या प्रकरणात सदर पोलिसांनी ११ आरोपींना अटक केली आहे. तर या प्रकरणात तपासात आणखी काहींना अटक होण्याची शक्यता असून त्यात नासुप्रचे काही अधिकारीही पोलिसांच्या रडारवर आहेत.पोलिसांनी अटक केलेल्यांमध्ये प्रवीण सहारे (गोधनी), पवनकुमार जंगेला (मनीषनगर), अथर्व भाग्यवंत (गोपालनगर बसस्थानक), प्रतिभा मेश्राम (अभ्यंकर चौक), कार्तिक ऊर्फ रजत लोणारे (लालगंज), सिद्धार्थ वासुदेव चव्हाण (स्नेह काॅलनी), मोहम्मद रियाज ऊर्फ बबलू अब्दुल रजिफ, नासिर हसन खान, इमरान अली अख्तर अली, रूपेश वारजुरकर (रामेश्वरी रिंगरोड) या आरोपींचा समावेश आहे.

पोलिसांच्या माहितीनुसार नोव्हेंबर महिन्यात सदर पोलीस ठाण्यात निशा जाजू यांनी एका फसवणुकीबाबत तक्रार केली होती. त्यात नारी परिसरात त्यांचे ३ हजार चौरस फुटाचा भूखंड आरोपींनी खोटे कागदपत्र तयार करून विक्री केले होते. या प्रकरणाची पोलिसांनी चौकशी केल्यावर या टोळीचा पर्दाफाश झाला. पोलिसांनी या प्रकरणात ११ आरोपींना अटकही केली आहे. तर या प्रकरणातील पाच आरोपी अद्यापही पसार आहेत. दरम्यान या प्रकरणात आणखी काहींना अटक होण्याची शक्यता असून नासुप्रचे अधिकारीही पोलिसांच्या रडारवर आहेत. त्यामुळे पोलिसांनी काही अधिकाऱ्यांना नोटीस देऊन काही प्रश्नांची उत्तरे मागितली आहेत.आरोपींकडून नासुप्रमधील कागदपत्रांची चोरी करून त्याच्या आधारावर बनावटी दस्तावेज तयार केले. हे कागदपत्र जुने दिसावे म्हणून आरोपींकडून चहाचे पाणी कागदावर लावण्याची युक्तीही शोधून काढण्यात आल्याचे पोलिसांच्या तपासात पुढे येत आहे.