गोंदिया,दि.14 : सामाजिक न्याय व विशेष सहाय्य विभागामार्फत प्रत्येक वर्षी अनुसूचित जाती प्रवर्गातील मॅट्रिकोत्तर शिक्षण घेत असलेल्या विद्यार्थ्यांना भारत सरकार शिष्यवृत्ती, शिक्षण शुल्क परिक्षा शुल्क तसेच राजर्षी शाहू महाराज गुणवत्ता शिष्यवृत्ती योजनांचा लाभ देण्यात येतो. शैक्षणिक सत्र 2022-23 करीता विद्यार्थ्यांचे ऑनलाईन अर्ज भरण्यासाठी महाडिबीटी प्रणाली दिनांक 22 सप्टेंबर 2022 पासून कार्यान्‍वीत करण्यात आलेली आहे, तरी मागील वर्षाचे तुलनेत अनुसूचित जाती प्रवर्गातील विद्यार्थ्यांचे आतापर्यंत 81% अर्ज भरण्याची नोंद झालेली आहे. तसेच समाज कल्याण कार्यालयाचे आयडीवर महाविद्यालयाकडून अर्ज सादर करण्याकरीता महाडिबीटी प्रणालीवर Scrutiny दिनांक 29 नव्हेंबर 2022 पासून कार्यान्‍वीत करण्यात आलेली आहे. तरीसुध्दा दिनांक 14.02.2023 पर्यंत सध्यस्थितीत अनुसूचित जातीच्या विद्यार्थ्यांचे भारत सरकार शिष्यवृत्ती योजनेचे 1058 अर्ज जिल्हयातील महाविद्यालयाचे आयडीवर प्रलंबित आहेत.
यासाठी जिल्हयातील शिष्यवृत्ती धारक विद्यार्थ्यांनी लवकरात लवकर शिष्यवृत्तीचा ऑनलाईन अर्ज भरावा, महाविद्यालयांच्या प्राचार्य यांनी विद्यार्थ्यांना शिष्यवृत्तीचा अर्ज भरण्याकरीता समान संधी केंद्रामार्फत मार्गदर्शन करावे व नियमित पाठपुरावा करावा. अनुसूचित जाती प्रवर्गातील विद्यार्थी शिष्यवृत्ती पासून वंचित राहिल्यास त्याची संपूर्ण जबाबदारी संबंधित महाविद्यालयाच्या प्राचार्यांची राहील. करिता संबंधित महाविद्यालयाच्या प्राचार्यांनी महाविद्यालयात प्रवेशित विद्यार्थ्यांचे शिष्यवृत्तीचे अर्ज दिनांक 20/02/2023 पर्यंत तपासून पात्र अर्ज सहायक आयुक्त, समाजकल्याण गोंदिया कार्यालयाचे आयडीवर सादर करावे. असे आवाहन समाज कल्याण विभागाचे सहायक आयुक्त विनोद मोहतुरे यांनी केले आहे.
