-भौतिकशास्त्र विभागातील डॉ. संजय ढोबळे व आदिती देशमुख यांचे संशोधन
नागपूर : दुचाकी स्वारांसाठी उपयुक्त ठरेल, असे फोल्डिंग हेल्मेट राष्ट्रसंत तुकडोजी महाराज नागपूर विद्यापीठातील संशोधकांनी तयार केले आहे. दोघांचीही हेल्मेट दुचाकीमध्ये ठेवता येणारे नाविन्यपूर्ण संशोधन भौतिकशास्त्र विभागातील वरिष्ठ प्राध्यापक डॉ. संजय ढोबळे व एमएससीची विद्यार्थिनी आदिती देशमुख यांनी केले आहे.

लोकांच्या सुरक्षिततेला प्राधान्य देत वाहतूक नियमात बदल केले जातात. त्यातच दुचाकी वाहनासाठी दोन्ही व्यक्तींना हेल्मेट घालावे, असे म्हटले आहे. हेल्मेट घालून दुचाकी चालवणे फार गरजेचे आहे. हेल्मेट न घातल्यामुळे कित्येक अपघात आपल्याला पाहायला मिळतात. त्यामुळे हेल्मेटची उपयुक्तता सगळ्यांना माहिती आहे. त्याकरिता दुचाकीवर एक हेल्मेट ठेवायची व्यवस्था देखील केलेली असते. मात्र, दोघांसाठी देखील हेल्मेट अनिवार्य केले तर जेव्हा वाहन उभे राहील त्यावेळी हेल्मेट कोठे ठेवायचे हा मोठा प्रश्न निर्माण झाला आहे. जेव्हा प्रश्न निर्माण होतात. तेव्हा त्यावर उपाय शोधणे हाच संशोधकांचा विषय होतो.

राष्ट्रसंत तुकडोजी महाराज नागपूर विद्यापीठाच्या भौतिकशास्त्र विभागातील वरिष्ठ प्राध्यापक डॉ. संजय जानराव ढोबळे यांनी एमएससी भौतिकशास्त्र विषयाची विद्यार्थिनी आदिती देवेंद्र देशमुख यांच्या सोबत संशोधन करून वाहन उभे असल्यावर दोन्ही हेल्मेट कसे ठेवता येईल. याकरिता फोल्डिंग हेल्मेटची कल्पना प्रत्यक्षात आणली आहे. त्यावर कार्य करीत दोघांनीही फोल्डिंग हेल्मेटची डिझाईन बनवून त्यातील सर्व कार्यपद्धती व मजबुती नियमित हेल्मेटप्रमाणे राहील याची काळजी घेत नवीन तंत्रज्ञानाच्या विज्ञानातून तयार केले व या फोल्डेड हेल्मेट करिता आंतरराष्ट्रीय पेटेंट देखील मिळविले आहे. नुकतेच डॉ. संजय ढोबळे व आदिती देशमुख या दोघांना आंतरराष्ट्रीय पेटंट मिळाले आहे. त्यांचे हेल्मेट तयार करण्याचे कार्य सुरू झाले आहे. या हेल्मेटची मजबूती नियमित हेल्मेटप्रमाणे राहून त्याद्वारे अपघाताच्या वेळी डोक्याला इजा होणार नाही, या प्रकारे साहित्य वापरण्यात येणार आहे. फोल्डिंग हेल्मेट उघडल्यावर व्यवस्थित उघडून ते डोक्यात घालता येईल, याची देखील काळजी घेण्यात आली आहेत. आजच्या परिस्थितीत ज्या दुचाकी वाहन आहे त्यामध्ये एक हेल्मेट ठेवण्याची व्यवस्था आहे व आता नवीन संशोधनाद्वारे तयार केलेले फोल्डिंग हेल्मेट ठेवण्याची व्यवस्था होईल. समाजाच्या हितासाठी केलेले संशोधन हे विद्यापीठासाठी गौरवाची बाब झाली आहे. समाजपयोगी संशोधन केल्याने विद्यापीठाचे माननीय प्रभारी कुलगुरू डॉ. प्रशान्त बोकारे, प्रभारी प्र-कुलगुरु डॉ. राजेंद्र काकडे, कुलसचिव डॉ. राजू हिवसे, वित्त व लेखा अधिकारी श्री हरीश पालीवाल, विज्ञान व तंत्रज्ञान विद्याशाखा अधिष्ठाता डॉ. प्रशांत माहेश्वरी, भौतिकशास्त्र विभाग प्रमुख डॉ. ओमप्रकाश चिमणकर यांच्यासह विद्यापीठातील सर्व विभाग प्रमुख, शिक्षक, कर्मचाऱ्यांनी डॉ. संजय ढोबळे व आदिती देशमुख यांचे अभिनंदन केले आहे.